རྒྱལ་ཡོངས་བོད་ཀྱི་སྒྲུང་ཐུང་འགྲན་བསྡུར་སྐབས་བཞི་བ་མཇུག་སྒྲིལ།

རང་རེའི་དྲ་བའི་འཕྲིན། ཟླ12པའི་ཚེས13ཉིན་རྒྱལ་ཡོངས་བོད་ཀྱི་སྒྲུང་ཐུང་འགྲན་སྡུར་སྐབས་བཞི་པའི་བྱ་དགའ་སྤྲོད་པའི་མཛད་སྒོ་དེ་ཟི་ལིང་དུ་བསྡུས། ཐེངས་འདིའི་རྩོམ་ཡིག་འགྲན་སྡུར་གྱི་བླང་བྱ་ནི་བསམ་བློའི་རང་བཞིན་དང་སྒྱུ་རྩལ་རང་བཞིན་ཟུང་དུ་འབྲེལ་བ་དཔྱད་འདེམ་གྱི་ཚད་གཞི་དང་། འདྲ་མཉམ་དང་དྲང་བདེན་སྲོག་ཏུ་འཛིན་པ་དེ་ཡིན་ལ། འགྲན་སྡུར་དུས་ཡུན་རྫོགས་རྗེས་རྩོམ་སྒྲིག་པ་དག་གིས་ཡང་ཡང་གྲོས་མོལ་བྱས་མཐར། རྩོམ་རིག་ལས་གནས་སུ་མིང་དུ་གྲགས་པའི་རྩོམ་པ་པོ་དང་དཔྱད་བརྗོད་པ། རྩོམ་སྒྲིག་པ་སོགས་མི་ལྔ་སྟེ་མིང་དུ་གྲགས་པའི་རྩོམ་པ་པོའམ་འཁྲབ་ཁྲིད་པ་པད་མ་ཚེ་བརྟན་དང་། མཚོ་སྔོན་དགེ་འོས་སློབ་གྲྭ་ཆེན་མོའི་དགེ་རྒན་རྡོ་དཀར་ཚེ་དཔལ་སྟོབས་ལྡན་དང་། 《སྦྲང་ཆར》རྩོམ་སྒྲིག་ཁང་གི་རྡོ་སྦིས་ཆོས་སྐྱོང་། མཚོ་སྔོན་མི་རིགས་སློབ་གྲྭ་ཆེན་མོའི་དགེ་རྒན་གུར་མགོན་ཚེ་རིང་། ཞིན་ཧེ་རྫོང་རྩོམ་རིག་སྒྱུ་རྩལ་མཉམ་འབྲེལ་ལྷན་ཚོགས་ཀྱི་ཀྲུའུ་ཞི་པད་མ་རིག་འཛིན་བཅས་ཀྱིས་གྲུབ་པའི་དཔྱད་འདེམ་ཚན་ཆུང་རྩ་འཛུགས་བྱས་ཤིང་།《མཚོ་སྔོན་བོད་ཡིག་གསར་འགྱུར》སྟེང་བཀོད་ཟིན་པའི་རྩོམ་ཡིག་རྣམས་དཔྱད་འདེམ་པ་ལྔ་བོའི་ལག་ཏུ་བཞག་སྟེ་ཁོ་ཚོས་རང་རང་ས་ནས་ཞིབ་ཀློག་བྱས་པ་རེད།

ཟླ12པའི་ཚེས5ཉིན་དཔྱད་འདེམ་ཚོགས་པས་དྲང་པོ་དྲང་གཞག་སྒོས་དཔྱད་འདེམ་གནང་རྗེས་འགྲན་སྡུར་གྱི་ཨང་རིམ་གསལ་བསྒྲགས་བྱས། ཐེངས་འདིའི་བྱ་དགའ་ཨང་དང་པོ་ནི་ཟླ་བ་གྲགས་པའི 《ང་རང་ས་འོག་ནས་སྐྱེས་པ་མིན》དང་། ཨང་གཉིས་པ་ནི་ཁྱུང་བོ་བསོད་ནམས་སྟོབས་རྒྱལ་གྱི《འཚོལ》དང་། དུང་བུ་ཆོས་འབུམ་རྒྱལ་གྱི《རླུང་ཡིན་ན་ཅི་མ་རུང》 ཨང་གསུམ་པ་ནི་རྦབ་ཆུའི《ཨང་གྲངས་སོ་བཞི》དང་། རྡོ་རྗེ་དོན་འགྲུབ་ཀྱི 《མིག་ཆུ་ནི་མར་ལྷུང་བར་ཡར་ལྡིང་བའི་སྐབས་ཤིག་ལ》 མ་ཅིག་འཚོའི《གྲིབ་མ》བཅས་ཡིན།

རྒྱལ་ཡོངས་བོད་ཀྱི་སྒྲུང་ཐུང་འགྲན་བསྡུར་སྐབས་བཞི་བའི་བྱ་དགའ་ཨང་དང་པོ་ཐོབ་མཁན། ཟླ་བ་གྲགས་པ།

རྒྱལ་ཡོངས་བོད་ཀྱི་སྒྲུང་ཐུང་འགྲན་བསྡུར་སྐབས་བཞི་བའི་བྱ་དགའ་ཨང་གཉིས་པ་ཐོབ་མཁན། དུང་བུ་ཆོས་འབུམ་རྒྱལ། ཁྱུང་པོ་བསོད་ནམས་སྟོབས་རྒྱལ།

རྒྱལ་ཡོངས་བོད་ཀྱི་སྒྲུང་ཐུང་འགྲན་བསྡུར་སྐབས་བཞི་བའི་བྱ་དགའ་ཨང་གསུམ་པ་ཐོབ་མཁན། རྦབ་ཆུ། རྡོ་རྗེ་དོན་འགྲུབ། མ་ཅིག་འཚོ།

ད་ལོའི་རྒྱལ་ཡོངས་བོད་ཀྱི་སྒྲུང་ཐུང་འགྲན་སྡུར་ནི་མཚོ་སྔོན་བོད་ཡིག་གསར་འགྱུར་ཁང་གིས་གཙོ་སྒྲུབ་བྱས་པ་དང་། མཚོ་སྔོན་ཞིང་ཆེན་རྩོམ་པ་པོ་མཐུན་ཚོགས་དང་། ཞིན་ཧེ་རྫོང་རྩོམ་རིག་སྒྱུ་རྩལ་མཉམ་འབྲེལ་ལྷན་ཚོགས་གཉིས་ཀྱིས་རོགས་སྒྲུབ་གནང་བའི་རྒྱལ་ཡོངས་རང་བཞིན་གྱི་རྩོམ་རིག་འགྲན་སྡུར་ཞིག་ཡིན་ལ། ཐེངས་འདིའི་རྩོམ་ཡིག་འགྲན་སྡུར་གྱི་རྩོམ་ཡིག་སྤེལ་ཡུན་ནི2021ལོའི་ཟླ1པའི་ཚེས1ཉིན་ནས2021ལོའི་ཟླ10པའི་ཚེས31ཉིན་བར་ཏེ་བསྡོམས་པས་ཟླ་ངོ་བཅུ་ཡིན། སྐབས་ཐོག་ཏུ་བོད་ལྗོངས་ཉིན་རེའི་ཚགས་པར་དང་། ཀྲུང་གོ་བོད་ཀྱི་དྲ་བ། མཚོ་སྔོན་བོད་སྐད་དྲ་ལམ་རྒྱང་སྒྲོག་བརྙན་འཕྲིན་ཁང་། བདེ་ཆེན་བོད་ཡིག་སྨྱན་སྦྱོར། ཁམས་པའི་དྲ་བ། མཚོ་སྔོན་བོད་ཡིག་གསར་འགྱུར་སོགས་བོད་ཀྱི་སྨྱན་སྦྱོར་ཆེ་ཁག་དང་། དེ་མིན་སྐད་འཕྲིན་དང་ཟིན་ཕྲན་སོགས་ཀྱི་བར་སྟོང་དུ་བརྒྱུད་སྐུར་བྱས་ཏེ་ཀུན་ལ་རྩོམ་ཡིག་འགྲན་སྡུར་སྤེལ་བའི་གནས་ཚུལ་ཞིབ་ཕྲ་དག་དུས་ལྟར་ཞུས། ཟླ་ངོ་བཅུའི་རིང་དུ་ཀན་སུའུ་དང་། བོད་ལྗོངས། སི་ཁྲོན། མཚོ་སྔོན་སོགས་ཡུལ་གྲུ་སོ་སོ་ནས་སྒྲུང་ཐུང174ལྷག་འབྱོར་བྱུང་ལ། དེ་དག་རེ་རེ་བཞིན་རྩོམ་སྒྲིག་པས་ཞིབ་ཀྱིས་བཀླགས་ཤིང་ཞུས་ཐེངས་དང་པོ་དང་གཉིས་པ། མཐའ་ཞུས་སོགས་བརྒྱུད་དེ《མཚོ་སྔོན་བོད་ཡིག་གསར་འགྱུར》སྟེང་རྩོམ་ཡིག་འབྱོར་བའི་སྔ་གཞུག་ལྟར་བསྡོམས་པས་རྩོམ་ཡིག42སྤེལ། ཐེངས་འདིའི་སྒྲུང་ཐུང་མང་ཆེ་བ་བརྗོད་བྱ་དང་རྗོད་བྱེད་གང་ཐད་ནས་དུས་རབས་ཀྱི་དབྱངས་འགྲོས་དང་མཐུན་ལ་སྒྱུ་རྩལ་གྱི་ཁྱད་ཆོས་མངོན་པར་དོད་པའི་དགེ་མཚན་དུ་མས་ཕྱུག

ཐེངས་འདིའི་རྩོམ་ཡིག་འགྲན་སྡུར་ལ་ཞིན་ཧེ་རྫོང་གི་སྦྱིན་བདག་ཆེན་མོ་སྐལ་བཟང་ཐུབ་བསྟན་ལགས་ཀྱིས་དམངས་སྒོར་ཁྲི་གཉིས་ཀྱིས་རོགས་སྐྱོར་མཛད་ཅིང་། བྱ་དགའ་ཐོབ་མཁན་ཨང་དང་པོར་དམངས་སྒོར10000དང་། ཨང་གཉིས་པར་སོ་སོར་དམངས་སྒོར8000དང་། ཨང་གསུམ་པར་སོ་སོར་དམངས་སྒོར6000བཅས་གནང་།

ཐེངས་འདིའི་བྱ་འགུལ་ལ་སྦྱིན་བདག་སྐལ་བཟང་ཐུབ་བསྟན་གྱིས་མ་དངུལ་སྒོར་ཁྲི2ཀྱི་ཞལ་འདེབས་གནང་བ།

ཐེངས་འདིའི་བྱ་འགུལ་ལ་མ་དངུལ་གྱི་རོགས་སྐྱོར་གནང་མཁན་སྦྱིན་བདག་སྐལ་བཟང་ཐུབ་བསྟན།