ཏང་ཀྲི་པུའུ་ཡི་གཞི་རྩའི་ལས་འགན་ནི་གང་དག་ཡིན་ནམ།

དེ་ཡང་ཏང་ཀྲི་པུའུ་ཡི་གཞི་རྩའི་ལས་འགན་ནི་གཤམ་གྱི་འདི་དག་ཡིན་ཏེ།

(གཅིག) ཏང་གི་རིགས་པའི་གཞུང་ལུགས་དང་ལམ་ཕྱོགས་བྱེད་ཕྱོགས་སྲིད་ཇུས་བཅས་དྲིལ་སྒྲོག་དང་ལག་ལེན་དངོས་འབེབས་བྱས་ཏེ། ཏང་ཀྲུང་དབྱང་དང་གོང་རིམ་ཏང་རྩ་འཛུགས་དང་ཏང་ཀྲི་པུའུ་འདི་གའི་གྲོས་ཆོད་ལེགས་པར་དྲིལ་སྒྲོག་དང་ལག་བསྟར་བྱེད་དགོས།རང་ས་ཁུལ་དང་རང་སྡེ་ཁག རང་ལས་ཁུངས་ཀྱི་དོན་དག་གལ་ཆེན་གྲོས་བསྡུར་ཐག་གཅོད་དམ་ཡང་ན་གྲོས་ཞུགས་ཐག་གཅོད་བྱེད་དགོས་ཤིང་། ཏང་ཡོན་གྱི་གདོང་ལེན་མིག་དཔེའི་ནུས་པ་གང་ལེགས་ཀྱིས་འདོན་སྤེལ་བྱས་ཏེ། མཐུན་སྒྲིལ་ངང་མང་ཚོགས་རྩ་འཛུགས་བྱེད་པ་དང་། རང་ས་ཁུལ་དང་རང་སྡེ་ཁག རང་ལས་ཁུངས་བཅས་ཀྱིས་ཁུར་དུ་བླངས་པའི་ལས་འགན་ཧུར་བརྩོན་གྱིས་འགྲུབ་པར་བྱེད་དགོས།

(གཉིས) ཏང་ཡོན་རྩ་འཛུགས་བྱས་ནས་ནན་ཏན་གྱིས་མར་ཁེ་སི་ལེ་ཉིན་རིང་ལུགས་དང་། མའོ་ཙེ་ཏུང་གི་དགོངས་པ། ཏེང་ཞའོ་ཕིང་གི་རིགས་པའི་གཞུང་ལུགས། “མཚོན་བྱེད་གསུམ”གྱི་དགོངས་པ་གལ་ཆེན། ཚན་རིག་དང་མཐུན་པའི་འཕེལ་རྒྱས་ལྟ་བ། ཞི་ཅིན་ཕེན་གྱི་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པ་བཅས་སློབ་སྦྱོང་བྱེད་དགོས་པ་དང་། “སློབ་གཉིས་བྱེད་གཅིག”གི་སློབ་སྦྱོང་སློབ་གསོ་རྒྱུན་རྣམ་ཅན་དང་ལམ་ལུགས་ཅན་དུ་འགྱུར་བར་སྐུལ་འདེད་བྱེད་དགོས་ཤིང་། ཏང་གི་ལམ་ཕྱོགས་བྱེད་ཕྱོགས་སྲིད་ཇུས་དང་གྲོས་ཆོད་བཅས་སློབ་སྦྱོང་བྱས་ཏེ། ཏང་གི་རྩ་བའི་ཤེས་བྱ་སློབ་སྦྱོང་དང་། ཚན་རིག་རིག་གནས། བཅའ་ཁྲིམས། ལས་སྒོའི་ཤེས་བྱ་བཅས་སློབ་སྦྱོང་བྱེད་དགོས་ལ། བསམ་བློའི་ཆབ་སྲིད་བྱ་བ་དང་འདུ་ཤེས་འཛིན་སྟངས་ཀྱི་བྱ་བ་ལེགས་པར་བསྒྲུབ་དགོས།

(གསུམ) ཏང་ཡོན་ལ་སློབ་གསོ་དང་དོ་དམ། ལྟ་སྐུལ་དང་ཞབས་ཞུ་སོགས་བྱས་ཏེ། ཆབ་སྲིད་ཀྱི་སློབ་གསོ་འབུར་ཐོན་བྱེད་པ་དང་། ཏང་ཡོན་གྱི་བྱང་ཚད་མཐོར་འདེགས་བཏང་སྟེ། ཕུགས་བསམ་དང་ཡིད་ཆེས་བརྟན་པོར་གཏོང་བ། ཏང་གཤིས་ཇེ་དྲག་ཏུ་གཏོང་བ། ཏང་གི་རྩ་འཛུགས་འཚོ་བ་གཟབ་ནན་བྱེད་པ་དང་། སྐྱོན་བརྗོད་དང་རང་སྐྱོན་རང་བརྗོད་སྤེལ་ནས། ཏང་གི་སྒྲིག་ཁྲིམས་སྲུང་སྐྱོང་དང་ལག་བསྟར་བྱེད་དགོས་ལ། ཏང་ཡོན་ལ་ལྟ་སྐུལ་བྱས་ནས་ཁ་མིན་དོན་གྱིས་འོས་འགན་ལག་བསྟར་བྱེད་དགོས་ཤིང་། ཏང་ཡོན་གྱི་ཁེ་དབང་ལ་གནོད་འཚེ་མི་ཐེབས་པར་འགན་སྲུང་བྱེད་དགོས། ཡུལ་འཁྱར་ཏང་ཡོན་གྱི་དོ་དམ་ལ་ཤུགས་སྣོན་དང་ལེགས་བཅོས་བྱེད་དགོས། འཚོ་བར་དཀའ་ཁག་ཆེ་བའི་ཏང་ཡོན་དང་ཏང་ཡོན་རྒན་པར་ཐུགས་ཁུར་དང་རོགས་སྐྱོར་བྱེད་དགོས། ཏང་གི་གྲོན་དངུལ་བསྡུ་སྤྲོད་དང་བཀོལ་སྤྱོད་དང་དོ་དམ་གྱི་བྱ་བ་ལེགས་པར་བསྒྲུབ་དགོས། སྒྲིག་སྲོལ་ལྟར་ཚད་མཐུན་མིན་པའི་ཏང་ཡོན་ལ་འོས་འཚམ་གྱིས་ཐག་གཅོད་བྱེད་དགོས།

(བཞི) མང་ཚོགས་ལ་འབྲེལ་འདྲིས་དམ་ཟབ་བྱས་ཏེ། མང་ཚོགས་ལ་ཏང་གི་སྲིད་ཇུས་དྲིལ་སྒྲོག་བྱེད་པ་དང་། དུས་རྒྱུན་དུ་མང་ཚོགས་ཀྱི་ཏང་ཡོན་དང་ཏང་གི་བྱ་བར་སྐྱོན་བརྗོད་དང་བསམ་འཆར་འདོན་པར་རྒྱུས་ལོན་བྱེད་དགོས་པ་དང་། མང་ཚོགས་ཀྱི་སྐྱིད་སྡུག་ཞུ་བར་རྒྱུས་ལོན་བྱས་ནས། མང་ཚོགས་ཀྱི་ལུགས་མཐུན་ཁེ་དབང་དང་ཁེ་ཕན་སྲུང་སྐྱོང་བྱེད་པ་དང་། མང་ཚོགས་ཀྱི་བསམ་བློའི་ཆབ་སྲིད་བྱ་བ་ལེགས་པར་བསྒྲུབ་ནས། རྒྱ་ཆེའི་མང་ཚོགས་ཀྱི་བློ་གྲོས་དང་སྟོབས་ཤུགས་གོང་བུ་གཅིག་ཏུ་འགྲིལ་བར་བྱེད་དགོས། རང་ས་ཁུལ་དང་རང་སྡེ་ཁག རང་ལས་ཁུངས་ཀྱི་བཟོ་ཚོགས་དང་ན་གཞོན་ལྷན་ཚོགས། བུད་མེད་རྩ་འཛུགས་སོགས་མང་ཚོགས་ཚོགས་པའི་རྩ་འཛུགས་དག་ལ་མགོ་ཁྲིད་དེ། ཁོ་ཚོས་རང་རང་གི་སྒྲིག་ཡིག་ནང་ལྟར་རང་རྐྱ་ཐུབ་པར་འགན་ཁུར་བའི་སྒོ་ནས་བྱ་བ་སྤེལ་བར་རྒྱབ་སྐྱོར་བྱེད་དགོས།

(ལྔ) ཏང་ལ་ཞུགས་པར་རེ་བ་བྱེད་པའི་ཧུར་བརྩོན་ཅན་ལ་སློབ་གསོ་དང་སྐྱེད་སྲིང་བྱས་ནས། རྒྱུན་ལྡན་རང་བཞིན་གྱི་ཏང་ཡོན་སྐྱེད་སྲིང་བྱ་བ་ལེགས་སྒྲུབ་བྱེད་དགོས་པ་དང་། ཆབ་སྲིད་ཀྱི་ཚད་གཞི་གཙོ་གནས་སུ་བཞག་སྟེ། བརྒྱུད་རིམ་གཟབ་ནན་དང་སྒྲིག་ཁྲིམས་ནན་མོ་བྱེད་དགོས། ཆབ་སྲིད་སྤུས་ཚད་དྭངས་གཙང་ཡིན་པའི་ཏང་ཡོན་སྐྱེད་སྲིང་བྱེད་དགོས། ཏང་ཡོན་དང་མང་ཚོགས་ཁྲོད་ཀྱི་ཕུལ་བྱུང་འཇོན་མི་གསར་དུ་མཐོང་བ་དང་སྐྱེད་སྲིང་དང་འོས་སྦྱོར་བྱེད་དགོས།

(དྲུག) ཏང་ཡོན་ལས་བྱེད་པ་དང་གཞན་པའི་ལས་བྱེད་མི་སྣར་ལྟ་སྐུལ་བྱས་ནས། རྒྱལ་ཁབ་ཀྱི་བཅའ་ཁྲིམས་དང་ཁྲིམས་སྲོལ་གཟབ་ནན་གྱིས་བརྩི་སྲུང་བྱེད་པ་དང་། རྒྱལ་ཁབ་ཀྱི་ནོར་སྲིད་དཔལ་འབྱོར་ཁྲིམས་སྲོལ་དང་མི་དོན་ལམ་ལུགས་གཟབ་ནན་གྱིས་བརྩི་སྲུང་བྱེད་དགོས་ཤིང་། རྒྱལ་ཁབ་དང་ཐུན་མོང་དང་མང་ཚོགས་ཀྱི་ཁེ་ཕན་ཧམ་བཟུང་བྱེད་མི་ཆོག

(བདུན) དངོས་ཐོག་བདེན་འཚོལ་གྱིས་ཏང་གི་འཛུགས་སྐྲུན་དང་ཏང་གི་བྱ་བར་བསམ་འཆར་དང་གྲོས་གཞི་བཏོན་ནས། དུས་ཐོག་ཏུ་རིམ་པ་གོང་མའི་ཏང་རྩ་འཛུགས་ལ་གནས་ཚུལ་གལ་ཆེན་ཡར་ཞུ་བྱེད་དགོས། ཏང་ཡོན་དང་མང་ཚོགས་ལ་སློབ་གསོ་བཏང་ནས་རང་རྟོགས་ཀྱིས་མི་ལེགས་པའི་ཕྱོགས་ཞེན་འགོག་དགོས་པ་དང་། བློ་ཐག་རྦད་ཆོད་ཀྱིས་སྒྲིག་འགལ་ཁྲིམས་འགལ་གྱི་བྱ་སྤྱོད་སྣ་ཚོགས་ལ་འཐབ་རྩོད་བྱེད་དགོས།

(བརྒྱད) གཏན་འབེབས་ནང་ལྟར། ཏང་ཡོན་དང་མང་ཚོགས་ལ་ཏང་གི་བྱ་བའི་གནས་ཚུལ་ཁྱབ་བསྒྲགས་བྱེད་དགོས་ཤིང་། ཏང་ནང་གི་འབྲེལ་ཡོད་ལས་དོན་ཡོངས་བསྒྲགས་བྱེད་དགོས་པ་བཅས་ཡིན།།