པདྨ་ཚེ་བརྟན་གྱི་གློག་བརྙན་བརྩམས་ཆོས་གསར་བ《དབུགས་ལྒང》“དེང་རབས་འཛམ་གླིང་གློག་བརྙན”བྱ་བའི་སྡེ་ཚན་དུ་ཚུད་པ།

མཚོ་སྔོན་ཞིང་ཆེན་སྲིད་གཞུང་དྲ་བའི་འཕྲིན། ཁ་ན་ཏའི་དུས་ཚོད་ཀྱི་སྤྱི་ཟླ8པའི་ཚེས13ཉིན། ཏའོ་ལུན་ཏའོ་ཡི་གློག་བརྙན་དུས་ཆེན་སྐབས་44པའི་འོས་མིང་དུ་ཚུད་པའི་བརྩམས་ཆོས་མིང་ཐོ་ཁྱབ་བསྒྲགས་བྱས་པ་ལྟར་ན། པདྨ་ཚེ་བརྟན་གྱིས་འཁྲབ་ཁྲིད་བྱས་པའི་གློག་བརྙན་བརྩམས་ཆོས་གསར་བ་སྟེ《དབུགས་ལྒང》ཞེས་པ“དེང་རབས་འཛམ་གླིང་གློག་བརྙན”བྱ་བའི་སྡེ་ཚན་དུ་ཚུད་ཡོད་པ་མ་ཟད།ད་དུང་སྤྱི་ཟླ་9པའི་ཟླ་སྟོད་དུ་མེ་གླིང་བྱང་མ་ནས་ཐོག་མའི་གཟིགས་འབུལ་གནང་འཆར་འདུག

གནས་ཚུལ་ཁྱབ་བསྒྲགས་བྱས་པ་དང་སྦྲགས་གློག་བརྙན་ཕྱོགས་ཀྱིས་ཀྱང་ཐོག་མའི་སྔོན་བརྡའི་བརྙན་ཐུང་བཀྲམ་པ་རེད།《དབུགས་ལྒང》ཞེས་པའི་གཏམ་རྒྱུད་འདིའང་སྔར་བཞིན་བོད་ཡུལ་དུ་བྱུང་ཞིང་། གློག་བརྙན་ནང་གཙོ་བོ་བླ་སྲོག་དང་དངོས་ཡོད་བར་གྱི་འབྲེལ་བ་གཙོར་བོར་བརྗོད་ཡོད། གློག་བརྙན་འདིའི་ཁྲོད་དུའང་འཁྲབ་ཁྲིད་པ་པདྨ་ཚེ་བརྟན་གྱིས་འདས་མ་ད་གསུམ་ལ་བརྟན་སྲུང་བྱས་པའི་མི་ཆོས་སྙིང་སྟོབས་སོར་བཞག་བྱས་ཤིང་། བོད་རིག་གནས་ཀྱི་ཐུན་མོང་མ་ཡིན་པའི་ཁྱད་འཕགས་ཀྱི་མཛེས་པ་མངོན་པར་མཚོན་ཡོད།

གློག་བརྙན《དབུགས་ལྒང》ནི་པེ་ཅིང་ཧྲིན་ཐང་དུས་རབས་རིག་གནས་བརྒྱུད་སྒྲོག་ཚད་ཡོད་ཀུང་ཟི་དང་གུང་ཁྲང་ཏཱ་མིན(ཐེན་ཅིན)གློག་བརྙན་ལས་རིགས་ཚད་ཡོད་ཀུང་ཟི། མཚོ་སྔོན་མ་ཎི་རྡོ་འབུམ་གློག་བརྙན་ལས་རིགས་ཚད་ཡོད་ཀུང་ཟི་བཅས་ཀྱིས་མཉམ་དུ་བསྒྲུབས་ཤིང་། པེ་ཅིང་ཅིའུ་ཀྲོའུ་དབུས་ཁུལ་གྱི་ཨང་ཀིའི་གློག་བརྙན་ཁང་ཚད་ཡོད་ཀུང་ཟི་དང་། ཨའེ་ཆིའི་སྒྱུ་རྩལ་ལས་རིགས(པེ་ཅིང)ཚད་ཡོད་ཀུང་ཟི་གཉིས་ཀྱིས་མཉམ་འབྲེལ་ཐོག་བསྐྲུན་པ་ཞིག་ཡིན། ཁྲི་ཅོ(Rediance)ཡིས་ཕྱི་རྒྱལ་དུ་འགྲེམ་སྤེལ་བྱ་བའི་ལས་ཚབ་ཀྱི་འགན་ཁུར་ཡོད།

རྒྱུས་ལོན་བྱུང་བ་ལྟར་ན། པདྨ་ཚེ་བརྟན་གྱིས་འཁྲབ་ཁྲིད་བྱས་པའི་བརྩམས་ཆོས་ནི་ཐེངས་དང་པོར་ཏའོ་ལུན་ཏའོ་ལ་འགྲེམས་སྟོན་བྱས་པ་ཞིག་མིན་པར། ཡར་སྔོན་དུ་《འཚོལ》དང་《ལག་དམར》ཡང་ཏའོ་ལུན་ཏའོ་གློག་བརྙན་དུས་སྟོན་སྟེང་གཟིགས་འབུལ་བྱས་མྱོང་། ཐེངས་འདིར་ཡང་ཁོང་གི་བརྩམས་ཆོས《དབུགས་ལྒང》ཞེས་པས་ལྟད་མོ་བ་རྣམས་ལ་མཐོང་ཚོར་གསར་བ་ཞིག་སྟེར་བར་ཡིད་ཆེས་ཟབ་མོ་ཡོད།