ཐེམ་ཆེན་རྫོང་གིས་ལྗང་མདོག་འཕེལ་རྒྱས་ཀྱི་སྐྱེ་ཁམས་ཁོར་སྲུང་མཁྲེགས་གཏོར་འཐབ་འཛིང་བསྟུད་མར་བཟང་བོར་སྤེལ། ​

མཚོ་ནུབ་སོག་རིགས་བོད་རིགས་རང་སྐྱོང་ཁུལ་ཐེམ་ཆེན་རྫོང་གིས་དུས་ནམ་ཡང་སྐྱེ་ཁམས་ཁོར་ཡུག་སྲུང་སྐྱོབ་དེ་རྫོང་ཡོངས་ཀྱི་བྱ་བ་གཙོ་བོར་བརྩིས་ནས། དོན་དངོས་ཀྱི་བྱེད་ཐབས་བརྒྱུད་དེ་ལྗང་མདོག་འཕེལ་རྒྱས་ཀྱི་སྐྱེ་ཁམས་ཁོར་སྲུང་མཁྲེགས་གཏོར་འཐབ་འཛིང་བསྟུད་མར་བཟང་བོར་སྤེལ།

གཅིག་ནས་ཆབ་སྲིད་ཀྱི་ལངས་གནས་ཇེ་མཐོར་བཏང་། ཏང་སྲིད་འགན་གཅིག་དང་ལས་གཅིག་འགན་གཉིས་ཀྱི་བླང་བྱ་ལྟར་དུ། རྫོང་ཁོར་ཡུག་སྲུང་སྐྱོབ་ཨུ་ཡོན་ལྷན་ཁང་དང་མུ་རི་སོལ་གཏེར་ཁུལ་གྱི་སྐྱེ་ཁམས་ཁོར་ཡུག་ཕྱོགས་བསྡུས་དག་ཐེར་བཅོས་སྐྱོང་བྱ་བའི་མགོ་ཁྲིད་ཚན་ཆུང་སོགས་བྱ་བའི་ལས་ཁུངས་བཙུགས་ནས། སྐྱེ་ཁམས་ཁོར་ཡུག་སྲུང་སྐྱོབ་ལ་གནོད་པ་བཟོ་བའི་འབུར་ཐོན་གནད་དོན་ལ་ཧུར་ཐག་གིས་ཞིབ་འཇུག་བྱས་ཏེ་ཐག་བཅད་པར་མ་ཟད། ཞིང་ཆེན་དང་ཁུལ་གྱི་འབྲེལ་ཡོད་སྡེ་ཁག་ལ་གཞོགས་འདེགས་ལེགས་པོ་བྱས་ཏེ། མུ་རི་གཏེར་ཁུལ་གྱི་ཁོར་ཡུག་དག་ཐེར་བཅོས་སྐྱོང་བྱ་བ་ཡོངས་འགྲུབ་བྱས་པར་ཞིང་ཆེན་རིམ་པ་དང་རྒྱལ་ཁབ་ཀྱི་རྩིས་ལེན་ཐོབ།

གཉིས་ནས་སྟེང་རིམ་གྱི་བཀོད་འདོམས་ལ་ཤུགས་བསྣན། སྔ་གཞུག་ཏུ་ཐེན་ཆེན་རྫོང་ཁོར་ཡུག་སྲུང་སྐྱོབ་ཨུ་ཡོན་ལྷན་ཁང་གི་ཁོངས་གཏོགས་ལས་ཁུངས་ཀྱི་བྱ་བའི་འགན་ནུས་ཞེས་པ་དང་། ཐེམ་ཆེན་རྫོང་ཁོར་ཡུག་སྲུང་སྐྱོབ་ཨུ་ཡོན་ལྷན་ཁང་གི་གྲོས་སྡུར་སྒྲིག་སྲོལ་ཞེས་པ་སོགས་ཀྱི་ལམ་ལུགས་གཏན་འབེབས་བྱས་པར་མ་ཟད། ཚེ་གང་བོར་འགན་ཁུར་རྩད་གཅོད་ལམ་ལུགས་དང་འདེམ་ཤོག་གཅིག་གི་ཟློག་དབང་ལམ་ལུགས་ལག་བསྟར་བྱས་ཏེ། བྱ་བའི་བཀོད་སྒྲིག་དང་ལྟ་སྐུལ། ཞིབ་བཤེར། འགན་འདྲི་བཅས་མུ་འབྲེལ་རྐྱེན་སྲོལ་ཆགས་པར་བྱས་ནས། སྐྱེ་ཁམས་ཁོར་ཡུག་སྲུང་སྐྱོབ་ཀྱི་ཡུན་ཕན་རྐྱེན་སྲོལ་ཧུར་ཐག་གིས་བཙུགས།

གསུམ་ནས་གཙོ་གཞིའི་འགན་འཁྲི་ཇེ་དྲག་ཏུ་བཏང་། སྐྱེ་ཁམས་ཁོར་སྲུང་གི་འགན་འཁྲི་གསལ་ཁྲ་གཏན་འབེབས་བྱས་ཏེ། བྱ་བའི་འགན་འཁྲི་དང་ལས་འགན་ཇེ་ཞིབ་ཏུ་བཏང་ནས། འབྲེལ་ཡོད་འགན་ཁུར་ལས་དང་འགན་ཁུར་མགོ་ཁྲིད་ལ་བགོས་པ་དང་། རིམ་པ་བཞིན་དུ་གནོན་ཤུགས་བརྒྱུད་སྤྲོད་དང་འགན་འཁྲི་དོན་འཁྱོལ་བྱས། རྫོང་ལྟ་ཞིབ་ཨུ་ཡོན་ལྷན་ཁང་བཙུགས་ཏེ། ལྟ་ཞིབ་དང་སྐོར་ཞིབ། ལྟ་སྒྲུབ་བཅས་ཀྱི་སྟོབས་ཤུགས་གཅིག་བསྡུས་སྒོས་ཁོར་སྲུང་གནད་དོན་གྱི་དག་ཐེར་དེ་ལྟ་ཞིབ་བྱ་བའི་གནད་སར་བརྩིས་པ་དང་། ཡུལ་དངོས་ཀྱི་ལྟ་ཞིབ་དང་ཡིག་ཐོག་གི་ལྟ་ཞིབ། མངོན་ཞིབ་ལྐོག་འདྲི་སོགས་ཀྱི་ཐབས་ཤེས་སྣ་མང་སྤྱད་ནས། ཏང་སྲིད་འགན་གཅིག་དང་ལས་གཅིག་འགན་གཉིས་ཀྱི་སྐོར་ཞིབ་སྒྲིག་འཛིན་ཤུགས་ཚད་ཇེ་དྲག་ཏུ་བཏང་།

བཞི་ནས་དཔྱད་ཞིབ་ལམ་ལུགས་གཟབ་ནན་དུ་བཏང་། ཁོར་ཡུག་སྲིད་འཛིན་ཁྲིམས་འཛིན་དང་ཁྲིམས་འཛུགས་སྦྲེལ་མཐུད་བྱ་བའི་མགོ་ཁྲིད་ཚན་ཆུང་བཙུགས་ཏེ། བྱ་སྤྱོད་རྣལ་མས་སྐྱེ་ཁམས་ཁོར་སྲུང་གནད་དོན་དག་ཐེར་བཟང་བོ་བྱས་པ་དང་། ཆབ་སྲིད་ཀྱི་རང་རྟོགས་མཐོན་པོས་སྐྱེ་ཁམས་བདེ་འཇགས་ཀྱི་ལྕགས་རི་བརྟན་པོར་བསྐྲུན།