“ཉི་འོག་བྱེ་ཐང་ངལ་གསོའི་གནས། མཐོ་སྒང་ཆུ་བོ་ཡིད་ཀྱི་གསོས།”བདེ་སྐྱིད་སྡེ་བས་ལྗོངས་རྒྱུ་ལ་བརྟེན་ཏེ་འཚི་ཚིས་གཉེར།

ཏང་གི་ཚོགས་ཆེན་བཅུ་དགུ་པའི་ཚུན་དུ། བློ་མཐུན་ཞི་ཅིན་ཕིང་སྲོག་ཤིང་ཡིན་པའི་ཏང་ཀྲུང་དབྱང་དང་།རྒྱལ་སྲིད་སྤྱི་ཁྱབ་ཁང་གིས་མཛུབ་སྟོན་འོག མཚོ་སྔོན་ཞིང་ཆེན་གྱིས་ཞིང་སྡེ་དར་སྤེལ་དང་ཁྱད་ལྡན་གྲོང་རྡལ་བསྐྲུན་པའི་ལས་དོན་ལ་ཚད་མཐོའི་མཐོང་ཆེན་བྱས་ཤིང་། ཡུལ་གཞན་དུ་གནས་སྤོ་བྱེད་པར་བརྟེན་ནས་དབུལ་ཐར་ཕྱུར་འགྱུར་ལ་སྐུལ་འདེད་དང་། དམངས་ཚིས་ལས་དོན་ཁག་གི་དོན་འཁྱོལ་ལ་སྐུལ་འདེད་གཏིང་ཟབ་བྱས་ཏེ། དམངས་ཡོངས་ཕྱུག་འགྱུར་ལམ་དུ་འཁྲིད།

བདེ་སྐྱིད་གྲོང་ཚོའི་ཉི་འོག་བྱེ་ཐང་།

བདེ་སྐྱིད་གྲོང་ཚོ་ནི་རྨ་ལྷོ་བོད་རིགས་རང་སྐྱོང་ཁུལ་གཅན་ཚ་རྫོང་གི་ཤར་ལྷོའི་ཕྱོགས་ཀྱི་རྨ་ཀླུང་སྔོན་མོའི་འགྲམ་ངོགས་སུ་ཆགས་ཡོད་ཅིང་། རང་བྱུང་ཁོར་ཡུག་གི་བཀོད་པ་མཛེས་ཤིང་། རྨ་ཀླུང་སྔོན་མོའི་མཛེས་བྱིན་ལ་རོལ་མྱོང་བྱ་ཆོག་ལ། སྡེ་མི་སྐྱིད་པའི་དཔལ་ལ་རོལ་བཞིན་གདའ། དེ་བཞིན། མཛེས་སྡུག་ལྡན་པའི་རྨ་ཆུ་ནི་བདེ་སྐྱིད་གྲོང་ཚོའི་སྐྱེ་ཁམས་སྲུང་ཡོལ་གལ་ཆེན་ཞིག་ཡིན་པ་མ་ཟད། ས་གནས་སྡེ་མི་རྣམས་དབུལ་ཐར་ཕྱུག་འགྱུར་ནས་འབྱོར་འབྲིང་ཕྱོགས་སུ་བསྐྱོད་པའི་གཡུལ་ས་གཙོ་བོ་རུ་ཡང་གྱུར་ཡོད།2016ལོའི་ཟླ6པ་ནས་བཟུང་།གཅན་ཚ་རྫོང་མཁར་དང་ཁ་ཐག་རིང་ཞིང་འཚོ་གནས་ཆ་རྐྱེན་ཞན་པ།འགྲིམ་འགྲུལ་སྟབས་བདེ་མིན་པའི་རུ་མ་ས་ཁུལ་གྱི་ཡུལ་ཚོ་དང་གྲོང་རྡལ7།སྡེ་བ30ཡི་རོང་འབྲོག་ཁྱིམ་ཚང251དང་མི946གཅིག་གྱུར་གྱིས་གནས་འདིར་སྤར་ཡོང་སྟེ། འཚོ་བ་གསར་པའི་དབུ་ཁྱིད་བྲི་འགོ་བརྩམས།


བདེ་སྐྱིད་གྲོང་ཚོའི་ཟུར་གཅིག

གཅན་ཚ་རྫོང་དབུལ་སྐྱོར་ཅུའུ་ཡི་ཅུའུ་ཀྲང་ཕག་མོ་བསོད་ནམས་ཀྱིས་ངོ་སྤྲོད་བྱས་པ་ལྟར་ན། གནས་སྤོ་ཐུབ་པ་དང་། བརྟན་པོར་གནས་ཐུབ་པ། རིམ་བཞིན་ཕྱུག་འགྱུར་ལམ་དུ་བསྐྱོད་ཐུབ་པ་བཅས་ཀྱི་དམིགས་འབེན་མངོན་འགྱུར་ཡོང་ཆེད། བདེ་སྐྱིད་གྲོང་ཚོས་རྨ་ཆུའི་མཛེས་པ་དང་གནམ་གཤིས། འགྲིམ་འགྲུལ་སྟབས་བདེ་བཅས་ཀྱི་མཐུན་རྐྱེན་ལ་བརྟེན་ནས། ཞིང་སྡེའི་ཡུལ་སྐོར་ཐོན་ལས་ལ་སྐུལ་འདེད་བཏང་ཞིང་། ཁམས་གཡེང་ཐང་ཆེན་དང་གྲུ་ཁ། སྒེར་འཁོར་བཏང་ནས་ཡུལ་སྐོར་བྱེད་པ། རས་གུར་ཕུབ་ནས་བྱེ་ཐང་ནས་འདུག་པ། གཉེན་སྒྲིག་པར་རྒྱག་རྟེན་གཞི། མེ་ཏོག་གི་ཞིང་ཁམས་སོགས་ཡུལ་སྐོར་ཐོན་ལས་ལས་གཞི་ལག་ལེན་དུ་བསྟར། 2017ལོ་ནས་བཟུང་། སྔ་གཞུག་ཏུ་གཙང་སྦྲ་བྱེད་མཁན77དང་། སྡེ་བའི་ཉེན་རྟོག་པ2།ཆུའི་དོ་དམ་མཁན2།ཡུལ་སྐོར་ཞབས་ཞུ་པ22བཅས་བཀོད་སྒྲིག་བྱས་ཏེ། ས་གནས་མང་ཚོགས་ཁྱིམ་ཚང30ཡིས་གཉེར་བཞིན་པའི་ཞིང་པའི་སྤྲོ་སྐྱིད་གླིང་དང་། ཁྱིམ་ཚང38ཀྱིས་གཉེར་བའི་ཁྱད་ལྡན་བཟའ་བཏུང་གི་འཕེལ་རྒྱས་ཐད་ལ་གཞོགས་འདེགས་ཀྱི་ནུས་པ་བཏོན་པས། ཡུལ་སྐོར་ལ་བརྟེན་ནས་མང་ཚོགས་དབུལ་ཐར་ཕྱུག་འགྱུར་ལམ་དུ་བསྐྱོད་པར་སྣེ་ཁྲིད་ཀྱི་ནུས་པ་འདོན་དང་འདོན་མུས་སུ་མཆིས།


འཇམ་དབྱངས་བསོད་ནམས་ཞིང་པའི་སྤྲོ་སྐྱིད་གླིང་།

ཀྲུང་གོའི་ཆེས་མཛེས་པའི་ཁམས་གསེང་ཞིང་སྡེ་རུ་གྱུར་ཡོད་པའི་བདེ་སྐྱིད་གྲོང་ཚོ་རུ། བདེ་སྐྱིད་གྲོང་ཚོའི་མིང་ནང་བཞིན་བདེ་སྐྱིད་ལམ་དུ་གོམ་ཁ་སྙེག་བཞིན་པའི་ས་གནས་སྡེ་མི་མང་པོ་ཞིག་ཡོད། དེ་ལས་སྡེ་མི་འཇམ་དབྱངས་བསོད་ནམས་ཀྱིས་བཤད་རྒྱུར། བདེ་སྐྱིད་གྲོང་ཚོ་ནི་ཁོ་རང་ཕྱུག་འགྱུར་གྱི་གནས་ལམ་དང་པོ་དེ་ཡིན། དེ་སྔར་དབྱར་རྩྭ་དགུན་འབུ་ནི་ཁྱིམ་གྱི་དཔལ་འབྱོར་ཡོང་ཁུངས་ཁོ་ན་ཡིན་ལ། 2016ལོ་ནས་བཟུང་། ཁོང་ཚང་གནས་འདི་གནས་སྤར་ཡོང་བ་ཡིན་ཞིང་། སྡེ་བའི་རྩ་འཛུགས་བྱས་པའི་གསོ་སྦྱོང་ལ་ཞུགས་ནས་ཞིང་པའི་སྤྲོ་སྐྱིད་གླིང་གཉེར། 2017ལོའི་ཟླ7པའི་ནང་། འཇམ་དབྱངས་བསོད་ནམས་ཀྱིས་ཐོག་མར་ཡུལ་སྐོར་བ་སྐོར་ཅིག་བསུས་ཏེ། ཏག་ཏག་ཟླ་ངོ་གསུམ་གྱི་དུས་ཡུན་ནང་སྒོར14000ལྷག་གི་ཡོང་སྒོ་ལ་རེག་ཐུབ་སོང་ཞེས་དགའ་སྤྲོའི་ངང་བཤད། དེ་བཞིན་འཇམ་དབྱངས་བསོད་ནམས་ཚང་དང་འདྲ་བར་ས་གནས་ཁྱིམ་ཚང་མང་པོ་ཞིག་གིས་ལྗོངས་བཀོད་ཀྱི་འགུག་ཤུགས་ལ་བརྟེན་ནས་ཡུལ་སྐོར་གྱི་ཡོང་འབབ་འཚོལ་གྱིན་ཡོད་ལ་འཚོ་བར་གནམ་ས་བླ་འོག་བསྒྱུར་བ་ལྟ་བུའི་འགྱུར་ལྡོག་ཆེན་པོ་བྱུང་ཡོད།



བདེ་སྐྱིད་གྲོང་ཚོའི་ཟུར་ཞིག

ཤེས་གསལ་ལྟར་ན། ཞིང་ཆེན་ཡོངས་ཀྱི་ཞིང་སྡེའི་ཡུལ་སྐོར་དང་དབུལ་སྐྱོར་ཐོན་ལས་ཚོགས་ཆེན་བདེ་སྐྱིད་གྲོང་ཚོ་ནས་སྤེལ་བས། ཞིང་ཆེན་ནང་ཁུལ་གྱི་ཡུལ་སྐོར་སྣེ་ལེན་ཁང40ཡིས་བདེ་སྐྱིད་གྲོང་ཚོ་དང་མཉམ་ལས་གྲོས་མཐུན་བཞག འདི་ལས་བདེ་སྐྱིད་གྲོང་ཚོའི་དཔལ་འབྱོར་ཁྱབ་ཁོངས་རྒྱ་བསྐྱེད་དང་ཡུལ་སྐོར་ལས་རིགས་འཕེལ་རྒྱས་ལ་ནུས་པ་གལ་ཆེན་ཐོན། 2018ལོའི་ཟླ7པའི་ཟླ་མཇུག་བར་དུ། ཡུལ་སྐོར་ཡོང་འབབ་སྒོར་ཁྲི300ལྷག་ཟིན།


ལོ་ཙཱ་བ། ཀླུ་མོ།