རྗེ་མི་ལས་གསུངས་པའི་རྒས་རྟགས་དགུ།

1

རྗེ་མི་ལས།.

བརྟོད་ཕུར་འདོན་པའི་ལྡང་ལུགས་དང་གཅིག །

བྱ་ལ་འཇབ་པའི་འགྲོ་ལུགས་དང་གཉིས། །

གསུམ་འདི་གསུམ་འཛོམ་པའི་དུས་ཚོད་ན། །

ཨ་ཕྱི་སྒྱུ་ལུས་རྒུད་པའི་ཡིད་ཕམ་མ། །

ལྡང་བའི་ཚེ་རང་བཞིན་གྱིས་འཕྲལ་དུ་ལྡང་མི་ནུས་པར་ལག་པ་གཉིས་ཀ་ས་ལ་བཙུགས་ནས་ས་སྲ་བ་ལས་བརྟོད་ཕུར་འདོན་པ་ལྟར་ལྡང་། འགྲོ་བའི་ཚེ་རྐེད་པ་སྒུར་བས་མགོ་བོ་བཏེག་མི་ནུས་ཤིང་གོམ་པའི་འདེགས་འཇོག་ཀྱང་མྱུར་དུ་བྱེད་མི་ནུས་པར་དལ་བུས་བྱིས་པ་བྱ་ལ་འཇབས་པ་ལྟར་འགྲོ །སྡོད་པའི་ཚེ་རྐང་ལག་ལྷུ་ཚིགས་ཐམས་ཅད་ན་བས་དལ་བུས་སྡོད་མི་ནུས་པར་ལུས་ཀྱི་ལྗིད་ཕབ་སྟེ་ས་དོ་ལུང་ཆད་དང་བཞིན་སྡོད།

2

ཕྱི་པགས་པ་འདུས་པའི་གཉེར་མ་དང་གཅིག །

ནང་ཤ་ཁྲག་ཟད་པའི་འབུར་གོབ་དང་གཉིས། །

བར་གླེན་ལྐུགས་འོན་ལོང་ཐོམ་ཡོར་དང་གསུམ། །

གསུམ་འདི་གསུམ་འཛོམས་པའི་དུས་ཚོད་ན། །

ཨ་ཕྱི་མི་སྡུག་སྟོན་པའི་ཁྲོ་གཉེར་ཅན། །

ལུས་ཀྱི་ཤ་ཟད་པས་པགས་པའི་སྐྱི་འདུས་ཏེ་ལུས་དང་ཁ་ངོ་ཐམས་ཅད་གཉེར་མས་གང་། ནང་གི་ཤ་ཁྲག་བྲི་བས་རུས་ཚིགས་ཐམས་ཅད་མངོན་ཏེ་འགྲམ་རུས་དང་ལྷུ་མགོ་ཐམས་ཅད་ཕྱི་ལ་འབུར། ཡིད་ཀྱི་དྲན་པ་ཉམས་བས་གླེན་ལྐུགས་དང་འོན་ལོང་དུ་གྱུར་ནས་སེམས་མི་གསལ་ཞིང་ཐོམ་ཡོར་རེ་སྡོད།

3

ལྕི་ལ་ཧྲུལ་བའི་དུགས་པོ་དང་གཅིག །

གྲང་ལ་ཉོག་པའི་བཟའ་བཏུང་དང་གཉིས། །

བགས་པོ་བཞི་སྦྱོར་གྱི་མལ་ས་དང་གསུམ། །

གསུམ་འདི་གསུམ་འཛོམ་པའི་དུས་ཚོད་ན། །

ཨ་ཕྱི་མི་འགོམ་ཁྱིས་ཁྱིས་འགོམ་གྱི་རྟོགས་ལྡན་མ། །

ལུས་ཀྱི་སྟོབས་ཉམས་ཤིང་མཛེས་འདོད་ཀྱི་གནས་སྐབས་ཉམས་པས་གོས་ཐབས་ཅད་ལྕི་ལ་ཧྲུལ། ཟས་སྐོམ་གྱི་ལྷག་ཞབས་ལ་སྤྱོད་ཅིང་ལྕེས་རོ་མི་ཚོར་པས་ཟས་ཐམས་ཅད་གྲང་ལ་ཉོག །ལུས་ལྕི་བས་གང་ལྟར་བྱས་ཀྱང་མི་བདེ་བས་ཕྱོགས་བཞི་རྟེན་པ་བྱས་ཤིང་དུས་རྒྱུན་དུ་མལ་ནས་ལྡང་མི་ནུས། དེའི་ཚེ་ཕྱིའི་སྒྱུ་ལུས་རྒུད་པས་ནང་དུ་ཡིད་ཕམ་ཞིང་སྡུག་བསྔལ་ཆེ། བཞིན་རས་ཀྱི་མཛེས་བཀྲག་ཉམས་ནས་པགས་པའི་གཉེར་མ་མང་བས་མི་སྡུག་པའི་ཁྲོ་གཉེར་སྟོན།. ཀུན་གྱི་བརྙས་བཅོས་བྱེད་ཅིང་མགོ་ཐོག་ཏུ་འགོམ་ནས་སོང་ཡང་ལྡང་མི་ནུས་པས་གཙང་བཙོག་མེད་པར་རྟོགས་ལྡན་ལྟར་སྡོད་པ་ཡིན།

ཀུན་བཟང་བླ་མའི་ཞལ་ལུང་ལས་བཏུས།