ཐོན་མིའི་སློབ་ཚོགས་ཀྱིས་གསོ་སྦྱོང་འཛིན་གྲྭ་བསྡུས་པ།

2018ལོའི་སྤྱི་ཟླ10ཚེས27ནས་ཚེས་29བར་གངས་ལྗོངས་ཤེས་རིག་ནོར་བུའི་སློབ་གླིང་གི་ཐོན་མིའི་སློབ་ཚོགས་ཀྱི་དྲྭ་ཚིགས་གསར་འགོད་པའི་གསོ་སྦྱོང་ཚོགས་འདུ་ཟི་ལིང་གྲོང་ཁྱེར་ཚོང་དཔོན་ནོར་བཟང་ཕོ་བྲང་དུ་གཟབ་རྒྱས་ངང་འཚོགས་ཤིང་། གངས་ལྗོངས་ཤེས་རིག་ནོར་བུའི་སློབ་གླིང་གི་ཐོན་མིའི་སློབ་ཚོགས་ཀྱིས་བོད་རང་གི་དྲ་བའི་ཁོར་ཡུག་བདེ་ཐང་ངང་འཚར་ལོངས་འབྱུང་བ་དང་། དྲ་བའི་དོ་དམ་པ་དང་དྲ་བའི་རྩོམ་སྒྲིག་པར་ཁྲིམས་ལུགས་སྐོར་གྱི་སློབ་སྦྱོང་ཡོད་པ། དྲ་བའི་གསར་འགོད་ཀྱི་གལ་ཆེན་རང་བཞིན་ལ་ངོས་ཟིན་ཟབ་མོ་ཐོབ་པ། གསར་འགོད་པའི་གསར་འགྱུར་གདམ་གསེས་བྱེད་སྟངས་ལ་ཆེད་ལས་རང་བཞིན་གྱི་མིག་ཟུང་བེད་སྤྱོད་ཐུབ་པ། གསར་འགྱུར་འགོད་པའི་དམིགས་ཡུལ་དང་རྩ་དོན་ལ་ཆེད་ལས་རང་བཞིན་གྱི་སློབ་སྦྱོང་ཡོད་པ། གསར་འགོད་པའི་འགན་འཁྲི་དང་བྱང་ཚད་ལ་ཆེད་ལས་ཤེས་ཡོན་གྱི་རྨང་གཞི་འདིང་བ་བཅས་ལ་དམིགས་ནས་གསར་འགོད་པའི་གསོ་སྦྱོང་ཚོགས་འདུ་འདི་ཉིད་བསྒྲུབས།

ཐེངས་འདིའི་གསོ་སྦྱོང་ཚོགས་འདུའི་སྟེང་དུ་མཚོ་སྔོན་རྒྱང་སྒྲོག་བརྙན་འཕྲིན་ཁང་དང་། ཀྲུང་གོའི་བོད་ཀྱི་དྲྭ་ཚིགས་རྩོམ་སྒྲིག་ཁང་། མཚོ་སྔོན་ཞིང་ཆེན་སྲིད་གཞུང་དྲ་བའི་རྩོམ་སྒྲིག་ཁང་། བོད་ཀྱི་ཤེས་རིག་སློོབ་གསོའི་དྲ་བའི་རྩོམ་སྒྲིག་ཁང་སོགས་གསར་འགྱུར་བརྒྱུད་ལམ་ཁག་ཆེ་ཤོས་ཀྱི་ཆེད་མཁས་པ་གདན་འདྲེན་ཞུས་ཡོད།

དེ་ཡང་གངས་ལྗོངས་ཤེས་རིག་ནོར་བུའི་སློབ་གླིང་གི་དྲྭ་ཚིགས་རྩོམ་སྒྲིག་པ་དང་གསར་འགོད་པ། གངས་ལྗོངས་རྩྭ་ཐང་བུ་མོའི་སློབ་གླིང་གི་གསར་འགོད་པ། གངས་ལྗོངས་སྤྲི་ཆུར་བཟོ་གྲྭའི་གསར་འགོད་པ་སོགས་མི་སྣ48དངོས་སུ་ཐེངས་འདིའི་གསོ་སྦྱོང་སྟེང་དུ་ཞུགས།

ཚེས27ཉིན་གྱི་སྔ་དྲོར་སློབ་དཔོན་འཇིགས་མེད་རྒྱལ་མཚན་མཆོག་གིས་གསོ་སྦྱོང་དང་འབྲེལ་ནས་བཀའ་སློབ་ཡིད་འཁུལ་བ་གནང་སྟེ་གསོ་སྦྱོང་དངོས་སུ་མག་ོབརྩམས། དེར་མཐུད་མཚོ་སྔོན་བོད་སྐད་རྒྱང་སྒྲོག་བརྙན་འཕྲིན་ཁང་བོད་སྐད་རླུང་འཕྲིན་གྱི་གསར་འགྱུར་ཚན་ཁག་གི་འགོ་བ་ཕྱུག་ལོ་ལགས་ཀྱིས་གསར་འགྱུར་བཅར་འབྲི་བྱ་ཐབས་དང་བཅར་འདྲི་བྱེད་སྐབས་ཀྱི་མཉམ་འཇོག་རང་བཞིན་སྐོར་འཆད་ཁྲིད་གནང་བ་དང་།

ཉིན་དེའི་ཕྱི་དྲོར་བོད་ཀྱི་ཤེས་རིག་སློབ་གསོའི་དྲྭ་ཚིགས་ཇུས་འགོད་པ་རྣམ་རྒྱལ་ལགས་ཀྱིས་དྲྭ་ཚིགས་ཇུས་འགོད་དང་རྩོམ་སྒྲིག་བྱེད་སྟངས་སྐོར་ནས་འཆད་ཁྲིད་གནང་། ཚེས28ཉིན་གྱི་སྔ་དྲོར་མཚོ་སྔོན་རྒྱང་སྒྲོག་བརྙན་འཕྲིན་ཁང་ཨ་མདོ་བརྙན་འཕྲིན་ཁང་གི་ཞུས་ཆེན་ལོ་ཙཱ་བ་ཨོ་རྒྱན་ལགས་ཀྱིས་གསར་འགྱུར་ལོ་ཙཱ་བྱེད་སྐབས་ཀྱི་མཉམ་འཇོག་རང་བཞིན་གྱི་སྐོར་འཆད་ཁྲིད་གནང་།

ཕྱི་དྲོར་མཚོ་སྔོན་ཞིང་ཆེན་སྲིད་གཞུང་དྲྭ་བའི་སྤྱི་ཁྱབ་རྩོམ་སྒྲིག་པ་ཨ་ལྡོང་དཔལ་རྡོ་ཐར་ལགས་ཀྱིས་དྲྭ་ཚིགས་དཔྱད་མཆན་འགོད་སྟངས་དང་དྲ་བར་དོ་དམ་བྱེད་ཐབས་སྐོར་འཆད་ཁྲིད་གནང་། གཞན་ཡང་འཆད་ཁྲིད་གྲོལ་རྗེས་ཐེངས་འདིའི་གསོ་སྦྱོང་སྟེང་ཞུགས་པའི་གསར་འགོད་པ་ཡོངས་ཀྱིས་དྲ་བའི་གསར་འགོད་དང་རྩོམ་སྒྲིག་ཐད་དུ་དཔྱད་གླེང་གཟབ་ནན་བྱས་པར་མ་ཟད་དྲ་བའི་གསར་འགོད་སྒྲིག་གཞི་དང་དོ་དམ་གྱི་ཕྱོགས་ལ་འཕྲི་སྣོན་གང་ལེགས་བྱས།

ཚེས29ཉིན་གྱི་སྔ་དྲོར་མཚོ་སྔོན་ཉིན་རེའི་ཚགས་པར་ཁང་དང་ཀྲུང་གོ་བོད་ཀྱི་དྲ་བའི་སྤྱི་ཁྱབ་རྩོམ་སྒྲིག་པ་རམས་ཚེ་བྷོ་ལགས་ཀྱིས་ཆེས་ཐ་མའི་འཆད་ཁྲིད་སྟེང་དྲྭ་ཚིགས་ཀྱི་བདག་དབང་དང་ཁྲིམས་ལུགས་སྐོར་གྱི་རྒྱུན་ཤེས་འཆད་ཁྲིད་གནང་ཞིང་། མཐར་གསོ་སྦྱོང་ལ་ཞུགས་པའི་གསར་འགོད་པ་རྣམས་ལ་ཐོན་མིའི་སློབ་ཚོགས་ཀྱིས་གསོ་སྦྱང་དཔང་ཡིག་སྤྲད་དེ་རེབ་འདིའི་གསོ་སྦྱོང་ཡོངས་སུ་བདེ་བླག་ངང་མཇུག་བསྡུས།

རྭ་རྒྱ་འཇིགས་མེད་རྒྱལ་མཚན་མཆོག་གིས་གསུང་བཤད་གནང་བ།

བོད་སྐད་རླུང་འཕྲིན་གྱི་གསར་འགྱུར་ཚན་ཁག་གི་ཀྲུའུ་རིན་ཕྱུག་ལོ་ལགས་ཀྱིས་འཆད་ཁྲིད་གནང་བ།

བོད་ཀྱི་ཤེས་རིག་སློབ་གསོའི་དྲྭ་ཚིགས་ཇུས་འགོད་པ་རྣམ་རྒྱལ་ལགས་ཀྱིས་འཆད་ཁྲིད་གནང་བ།

ཨ་མདོ་བརྙན་འཕྲིན་ཁང་གི་ཞུས་ཆེན་ལོ་ཙཱ་བ་ཨྱོན་ལགས་ཀྱིས་འཆད་ཁྲིད་གནང་བ།

མཚོ་སྔོན་ཞིང་ཆེན་སྲིད་གཞུང་དྲྭ་བའི་སྤྱི་ཁྱབ་རྩོམ་སྒྲིག་པ་ཨ་ལྡོང་དཔལ་རྡོ་ཐར་ལགས་ཀྱིས་འཆད་ཁྲིད་གནང་བ།

མཚོ་སྔོན་ཉིན་རེའི་ཚགས་པར་ཁང་དང་ཀྲུང་གོ་བོད་ཀྱི་དྲ་བའི་སྤྱི་ཁྱབ་རྩོམ་སྒྲིག་པ་རམས་ཚེ་བྷོ་ལགས་ཀྱིས་འཆད་ཁྲིད་གནང་བ།

ཚོགས་རའི་ཡུལ་དངོས།

དགེ་སློབ་ཡོངས་ཀྱི་མཉམ་པར།