མཚོ་སྔོན་ཞིང་ཆེན་མི་དམངས་སྲིད་གཞུང་དྲ་བ།
སྤྱི་ལོ་གསར་ཚེས་ཀྱི་སྔ་ཉིན། རྒྱལ་ཁབ་ཀྱི་ཀྲུའུ་ཞི་ཞི་ཅིན་ཕིང་གིས་ཀྲུང་དབྱང་རླུང་འཕྲིན་བརྙན་འཕྲིན་སྤྱི་ཁྱབ་ལས་ཁུངས་དང་སྦྲེལ་དྲ་བརྒྱུད་དེ། ཉིས་སྟོང་ཉེར་དྲུག་ལོའི་སྤྱི་ལོ་གསར་ཚེས་ལ་ཤིས་ཚིག་ཕུལ།
སྤྱི་ལོ་གསར་ཚེས་ཀྱི་སྔ་ཉིན། རྒྱལ་ཁབ་ཀྱི་ཀྲུའུ་ཞི་ཞི་ཅིན་ཕིང་གིས་ཀྲུང་དབྱང་རླུང་འཕྲིན་བརྙན་འཕྲིན་སྤྱི་ཁྱབ་ལས་ཁུངས་དང་སྦྲེལ་དྲ་བརྒྱུད་དེ། ཉིས་སྟོང་ཉེར་དྲུག་ལོའི་སྤྱི་ལོ་གསར་ཚེས་ལ་ཤིས་ཚིག་ཕུལ། ཤིས་ཚིག་གི་ནང་དོན་གཤམ་གསལ་ལྟར།
ལྷན་རྒྱས་སྐུ་ཁམས་བཟང་། དུས་ཀྱི་འཁོར་འགྲོས་བར་མེད་རྒྱུ། བཀྲ་ཤིས་དཔལ་བཟང་གསར་བ་བསུ། གནམ་ལོ་གསར་བ་སླེབས་ལ་ཉེ་བའི་དུས་འདིར། ངས་པེ་ཅིང་དུ་ལྷན་རྒྱས་ལ་བཀྲ་ཤིས་པའི་སྨོན་འདུན་བཟང་པོ་ཞུ་རྒྱུ་ཡིན།
2025ལོ་ནི“ལོ་ལྔའི་འཆར་འགོད་བཅུ་བཞི་པ”མཇུག་བསྡུ་བའི་ལོ་ཡིན་ལ། ལོ་ལྔའི་རིང་ང་ཚོས་འབད་འབུངས་ཡར་བརྩོན་དང་ཞུམ་མེད་མདུན་སྐྱོད་སྒོས་དཀའ་ངལ་དང་འགྲན་སློང་སྣ་ཚོགས་ཁྱད་དུ་བསད་ཅིང་། དམིགས་འབེན་ལས་འགན་ཁག་ཅིག་ལེགས་པར་འགྲུབ་ནས། ཀྲུང་གོའི་ལུགས་ཀྱི་དེང་རབས་ཅན་གྱི་འཐབ་ལམ་གསར་པར་གོམ་སྟབས་བརྟན་པོ་སྤོས་ཡོད། རང་རྒྱལ་གྱི་དཔལ་འབྱོར་བསྡོམས་འབོར་བསྟུད་མར་ཐོད་བརྒལ་གསར་བ་བྱུང་སྟེ། ད་ལོར་སྔོན་དཔག་བྱས་ན་སྒོར་ཁྲག་ཆེན་གཅིག་ཁྲག་ཁྲིག་བཞིར་སླེབས་རྒྱུ་ཡིན་པ་དང་། དཔལ་འབྱོར་གྱི་སྟོབས་ཤུགས་དང་ཚན་རྩལ་གྱི་སྟོབས་ཤུགས། རྒྱལ་སྲུང་གི་སྟོབས་ཤུགས། ཕྱོགས་བསྡུས་རྒྱལ་སྟོབས་བཅས་སྐས་རིམ་གསར་པ་ཞིག་ཏུ་སླེབས་ཤིང་། སྔོ་ལྗང་གི་རི་ཆུ་ནི་ཆེས་བཀྲག་མདངས་འཚེར་བའི་གཞི་མདངས་སུ་གྱུར་ཏེ། མི་དམངས་མང་ཚོགས་ཀྱི་ཐོབ་སྣང་དང་སྐྱིད་སྣང་། བདེ་སྣང་བཅས་ཟམ་མ་ཆད་པར་མཐོ་རུ་ཕྱིན་ཡོད། ལོ5རིང་གི་ལོ་རྒྱུས་འཕེལ་རིམ་དེ་སྤྱིར་བཏང་མིན་ལ། དེའི་རིང་གི་གྲུབ་འབྲས་ཡང་ལས་སླ་པོར་ཐོབ་པ་ཞིག་ག་ལ་ཡིན། ཚང་མས་འབད་འབུངས་ཡར་བརྩོན་དང་དཀའ་སྤྱད་འབད་བརྩོན་གྱིས་ལེགས་སྐྱེས་ཕུལ་ནས་དར་རྒྱས་གོང་འཕེལ་དུ་འགྲོ་བའི་ཀྲུང་གོའི་རྣམ་པ་འདི་བསྐྲུན་པ་རེད། ངས་དཀའ་སྤྱད་འབད་བརྩོན་གྱི་ལེགས་སྐྱེས་ཕུལ་མཁན་ཚང་མར་གུས་འདུད་ཞུས་པ་ཡིན།
ལོ་འདིར་ཆེས་བརྗེད་དཀའ་བ་ཞིག་ནི། ང་ཚོས་ཀྲུང་གོའི་མི་དམངས་ཀྱི་འཇར་འགོག་དམག་འཁྲུག་དང་འཛམ་གླིང་གིས་ཧྥ་ཞི་སིར་ངོ་རྒོལ་བྱེད་པའི་དམག་འཁྲུག་ལ་རྒྱལ་ཁ་ཐོབ་ནས་ལོ་ངོ་80འཁོར་བར་གཟབ་རྒྱས་ངང་རྗེས་དྲན་ཞུས་པ་དང་། ཐའེ་ཝན་བསྐྱར་གསོའི་རྗེས་དྲན་ཉིན་མོ་གཏན་འཁེལ་བྱས། རྒྱལ་ཁབ་ཀྱི་མཛད་སྒོར་གཟབ་རྒྱས་ཆེ་ཞིང་རྔམ་བརྗིད་ལྡན་ལ། རྒྱལ་ཁའི་གཟི་བརྗིད་ཇི་སྲིད་བར་དུ་ལོ་རྒྱུས་ཀྱི་དེབ་ཐེར་ནང་འཁོད་རྒྱུ་དང་། ཀྲུང་ཧྭའི་བུ་དང་བུ་མོ་ཚོས་ལོ་རྒྱུས་ཡིད་ལ་དམ་པོར་བཅངས་པ་དང་། སྔོན་གཤེགས་དཔའ་བོར་རྗེས་དྲན་ཞུ་བ། ཞི་བདེར་གཅེས་སྤྲས་བྱེད་རྒྱུ། འབྱུང་འགྱུར་གསར་དུ་གཏོད་པར་སྐུལ་ལྕགས་ཐེབས་རྒྱུ་དང་། ཀྲུང་ཧྭ་མི་རིགས་རླབས་ཆེན་བསྐྱར་དར་གྱི་འཛད་མེད་སྟོབས་ཤུགས་གཅིག་ཏུ་བསྡུ་ཐུབ་རྒྱུ་རེད།
ང་ཚོས་གསར་གཏོད་ལ་བརྟེན་ནས་སྤུས་ལེགས་འཕེལ་རྒྱས་ལ་ནུས་ཤུགས་འདོན་སྤྲོད་བྱས་ཡོད། ཚན་རྩལ་དང་ཐོན་ལས་མཉམ་འདྲེས་གཏིང་ཟབ་བྱས་ཤིང་། གསར་གཏོད་དང་གྲུབ་འབྲས་གཅིག་རྗེས་གཉིས་མཐུད་གྱིས་ཐོན་པ་དང་། མིས་བཟོས་རིག་ནུས་ཀྱི་དཔེ་དབྱིབས་ཆེན་པོ་གཅིག་ལ་གཅིག་འགྲན་ངང་ཐོན། ཉིང་ལེབ་རང་བརྟེན་ཞིབ་འཇུག་གསར་སྤེལ་ཐད་ཐོད་བརྒལ་གསར་པ་བྱུང་ནས། རང་རྒྱལ་འདི་ཉིད་གསར་གཏོད་ཀྱི་ནུས་ཤུགས་གོང་འཕེལ་མགྱོགས་པའི་དཔལ་འབྱོར་མ་ལག་གི་གྲས་ཤིག་ཏུ་གྱུར་ཡོད། གནམ་དཔྱད་གཉིས་པ་རྟགས་ཅན་གྱི“རྒྱུ་སྐར་འཚོལ་སྙེག”གི་མགོ་བརྩམས་པ་དང་། ཡར་ཀླུང་གཙང་པོའི་སྨད་རྒྱུད་ཀྱི་ཆུ་གློག་བཟོ་སྐྲུན་མགོ་བརྩམས་པ། གློག་ཁབ་ལེན་གྱི་ལྡེམ་འཕེན་རྣམ་པའི་མ་གྲུ་ཐོག་མ་དེ་དངོས་སུ་རུ་ཞུགས་བྱས་པ། མི་གཟུགས་འཕྲུལ་མིས“དྲག་རྩལ་ངོམས་པ”དང་མི་མེད་གནམ་གྲུས༼ཚོན་ལྡན་ཤོག་སྦག༽གཏོང་བའི་འཁྲབ་སྟོན་བྱས་ཡོད། གསར་གཏོད་དང་གསར་སྐྲུན་ལ་བརྟེན་ནས་ཐོན་སྐྱེད་ནུས་ཤུགས་གསར་པ་ཐོན་རྒྱུར་སྐུལ་འདེད་དང་འཚོ་བ་སྔར་བས་ཕུན་སུམ་ཇེ་ཚོགས་སུ་ཕྱིན་ཡོད།
ང་ཚོས་རིག་གནས་ལ་བརྟེན་ནས་བསམ་པའི་ཁྱིམ་གཞིས་བསྐྲུན་ཏེ། རིག་རྫས་དང་གཟུགས་འདས་ཤུལ་བཞག་གི་ཚ་རླབས་ཆེ་རུ་ཕྱིན་པ་དང་། འཛམ་གླིང་གི་ཤུལ་བཞག་གསར་སྣོན་བྱས་ཤིང་། ཝུའུ་ཁུང་དང་ནི་ཏྲ་འཛམ་གླིང་ཀུན་ཏུ་གྲགས་པ་དང་། གནའ་བོའི་ཉམས་འགྱུར་དེ་ན་གཞོན་ཚོའི“རྩེར་སོན་གྱི་མཛེས་དཔྱོད”ཅིག་ཏུ་གྱུར་ཡོད། རིག་གནས་དང་ཡུལ་སྐོར་ཁྲོམ་རའི་འདུ་འཛི་ཆེ་རུ་གྱུར་ནས། “གྲོང་ཁྱེར་གྱི་རྐང་དྲུག་འགྲན་སྡུར”དང“གྲོང་ཚོའི་རྐང་དྲུག་འགྲན་སྡུར”ལ་དགའ་བསུ་ཆེན་པོ་ཐོབ་པ་དང་། གངས་འཁྱག་ལུས་རྩལ་གྱིས་དགུན་དུས་ཀྱི་སྤྲོ་སེམས་འཕེལ་བར་བྱས་ཡོད། སྲོལ་རྒྱུན་དང་དེང་རབས་མཉམ་འདྲེས་བྱས་ཏེ། ཀྲུང་ཧྭའི་རིག་གནས་ལ་བཀྲགས་མདངས་ལྡན་པའི་འོད་སྣང་འཚེར་ཡོད།
ང་ཚོས་བདེ་སྐྱིད་ཀྱི་འཚོ་བ་མཉམ་སྐྲུན་མཉམ་སྤྱོད་བྱས་ཡོད། ང་རང་བོད་ལྗོངས་དང་ཞིན་ཅང་དུ་སོང་ནས་རྟེན་འབྲེལ་བྱེད་སྒོར་ཞུགས་པ་ན། གངས་ལྗོངས་མཐོ་སྒང་ནས་ཐེན་ཧྲན་རི་བོའི་ལྷོ་བྱང་བར་མི་རིགས་ཁག་གི་མང་ཚོགས་གཅིག་སེམས་གཅིག་ཏུ་སྦྲེལ་ཏེ། སེ་འབྲུའི་འབྲས་རྡོག་བཞིན་མཉམ་གཅིག་ཏུ་འཛོམས་ནས། ཚང་མས་ཁ་བཏགས་དཀར་པོ་དང་སྤྲོ་སེམས་འཁོལ་བའི་གླུ་གར་ལས། མེས་རྒྱལ་ལ་བཅངས་པའི་དགའ་ཞེན་དང་བདེ་སྐྱིད་ལ་བསྟོད་བསྔགས་བྱེད་བཞིན། དམངས་ཀྱི་འཚོ་བར་དོན་ཆུང་ཟེར་བ་མེད་ལ་ཡོད་ཚད་བརྩེ་བས་ཁེངས་ཡོད། འདས་པའི་ལོ་གཅིག་རིང་། གསར་དུ་ལས་ཞུགས་བྱས་པའི་ཚོགས་སྤྱིའི་ཁེ་དབང་ལ་སྔར་ལས་འགན་སྲུང་ལེགས་པོ་བྱས་ཤིང་། རྒན་པར་འཚམ་པའི་རྒས་འགྱུར་ལེགས་བཅོས་བྱས་ཏེ་རྒན་པར་སྟབས་བདེ་བསྐྲུན་པ་དང་། བྱིས་སྐྱོང་ཁྱིམ་ཚང་ལ་ཟླ་རེར་ཁ་གསབ་སྒོར300ཇེ་མང་དུ་བཏང་ཡོད། ཇ་མར་ཚྭ་བུལ་དང་། ཉིན་རེའི་ལྟོ་ཐུན་གསུམ་དང་དུས་ཚིགས་བཞི་པོར། “ཁྱིམ་ཚང་ཆུང་ཆུང་”རེ་རེར་ཚ་ཚ་འུར་འུར་གྱི་རྣམ་པས་ཁེངས་ཏེ། “ཀྲུང་གོའི“ཁྱིམ་ཚང་ཆེན་མོ”འདི་ཡར་ངོའི་ཟླ་ལྟར་འཕེལ་བཞིན་ཡོད་པའི་རྣམ་པ་མངོན་འདུག
ང་ཚོས་མུ་མཐུད་དུ་བློ་རྒྱ་ཡངས་པོས་འཛམ་གླིང་ལ་ཕྱོགས་དགོས། ཧྲང་ཧའེ་མཉམ་ལས་རྩ་འཛུགས་ཐེན་ཅིན་གྱི་མཐོ་རིམ་རྩེ་ཚོགས་དང་། འཛམ་གླིང་ཡོངས་ཀྱི་བུད་མེད་མཐོ་རིམ་རྩེ་ཚོགས་བདེ་བླག་ངང་བསྡུས་པ་དང་། ཧའེ་ནན་རང་མོས་ཉོ་ཚོང་གྲུ་ཁས་གླིང་ཕྲན་ཡོངས་སུ་གློད་སྡོམ་གཉིས་ལྡན་གྱི་སྒོ་ཁྲལ་ལས་གཉེར་བྱས་ཡོད། སྔར་ལས་ལྷག་པའི་སྒོ་ནས་གནམ་གཤིས་འགྱུར་ལྡོག་ལ་ཁ་གཏད་ཆེད། རང་རྒྱལ་གྱིས་རེས་སྐོར་གསར་པའི་རྒྱལ་ཁབ་ཀྱི་རང་བརྟེན་བྱས་རྗེས་ཁྱབ་བསྒྲགས་བྱས་ཤིང་། “གྲོས་གཞི་ཆེན་པོ་གསུམ”གྱི་རྗེས་སུ་ངས་འཛམ་གླིང་ཡོངས་བཅོས་སྐྱོང་གི་གྲོས་གཞི་བཏོན་ནས། སྔར་ལས་གཞུང་དྲང་ལུགས་མཐུན་གྱི་འཛམ་གླིང་བཅོས་སྐྱོང་མ་ལག་འཛུགས་སྐྲུན་བྱ་རྒྱུར་སྐུལ་འདེད་བཏང་ཡོད། དེང་གི་འཛམ་གླིང་ཟང་ཟིང་དུ་གྱུར་པ་དང་། ས་ཁུལ་ཁ་ཤས་སུ་སྔར་བཞིན་དམག་འཁྲུག་གི་མེ་ལྕེ་འཁྲིགས་བཞིན་ཡོད། ཀྲུང་གོ་ཐོག་མཐའ་བར་གསུམ་དུ་ལོ་རྒྱུས་ཀྱི་ཡང་དག་པའི་ཕྱོགས་སུ་ལངས་ཏེ། རྒྱལ་ཁབ་ཁག་དང་ལག་གདང་སྦྲེལ་ནས་འཛམ་གླིང་གི་ཞི་བདེ་འཕེལ་རྒྱས་ལ་སྐུལ་འདེད་དང་མིའི་རིགས་ཀྱི་ལས་སྐལ་གཅིག་མཐུན་ཚོགས་པ་འཛུགས་རྒྱུར་སྐུལ་འདེད་གཏོང་འདོད་ཡོད།
ཅང་མ་འགོར་བའི་ཡར་སྔོན་ལ། ང་རང་རྒྱལ་ཡོངས་ལུས་རྩལ་འགྲན་ཚོགས་ཀྱི་འགོ་རྩོམ་མཛད་སྒོར་ཞུགས་ཏེ། ཀོང་ཏུང་དང་ཞང་ཀང་། ཨའོ་མོན་བཅས་ས་ཁུལ་གསུམ་གྱིས་སེམས་མཐུན་མཉམ་སྐྱོད་བྱེད་པ་ནི་དགའ་འོས་པ་ཞིག་ཡིན་ལ། “རྒྱལ་ཁབ་གཅིག་ལ་ལམ་ལུགས་གཉིས”ཀྱི་བྱེད་ཕྱོགས་དེ་བློ་བརྟན་འགྱུར་མེད་ཀྱིས་ལག་ཏུ་བསྟར་ནས། ཞང་ཀང་དང་ཨའོ་མོན་སྔར་ལས་ལེགས་པའི་སྒོ་ནས་རྒྱལ་ཁབ་འཕེལ་རྒྱས་ཀྱི་སྤྱི་ཡོངས་ནང་མཉམ་འདྲེས་ཐུབ་པར་རྒྱབ་སྐྱོར་ཐོབ་ནས། ཡུན་རིང་དར་རྒྱས་བརྟན་བརླིང་རྒྱུན་འཁྱོངས་བྱས་ཡོད་ལ། འགྲམ་གཉིས་ཀྱི་སྤུན་ཟླ་བརྩེ་སེམས་གཅིག་ཏུ་འདྲེས་ཏེ། མེས་རྒྱལ་གཅིག་གྱུར་ཡོང་བའི་ལོ་རྒྱུས་ཀྱི་འཕེལ་ཕྱོགས་ཆེན་པོ་འགོག་ཐབས་གཏན་ནས་མེད།
ཏང་དར་ན་ད་གཟོད་རྒྱལ་ཁབ་སྟོབས་ཆེན་དུ་འགྲོ་ཐུབ། ང་ཚོས་ཀྲུང་དབྱང་གི་གཏན་འབེབས་དོན་ཚན་བརྒྱད་ཀྱི་དགོངས་དོན་ལག་བསྟར་གཏིང་ཟབ་བྱེད་པའི་སློབ་སྦྱོང་སློབ་གསོ་སྤེལ་ཞིང་། ཁ་དན་ཚིག་ལ་གནས་ཏེ་ཏང་ལ་དོ་དམ་དང་ཏང་བཅོས་སྐྱོང་ནན་མོ་བྱས་པ་དང་། རུལ་སེལ་སྟོབས་བསྐྱེད་ཀྱིས་རང་ངོས་གསར་བརྗེ་ལ་སྐུལ་འདེད་བཏང་ནས། ཏང་སྲོལ་སྲིད་གཙང་རྒྱུན་མཐུད་ངང་ཇེ་ལེགས་སུ་ཕྱིན། ཐོག་མའི་བསམ་འདུན་དང་འགན་འཁྲི་ལག་ཏུ་བསྟར་ནས། རྒྱུན་འཁྱོངས་ལྷོད་མེད་དང་ཡུན་རིང་བྱས་རྗེས་བཞག་སྟེ། ཡན་ཨན་གྱི“ས་ཕུག་དྲི་བར”མུ་མཐུད་དུ་ལན་ཡག་པོ་བཏབ་ནས། མི་དམངས་ལ་ངོ་གནོང་མི་དགོས་པའི་དུས་རབས་ཀྱི་རྒྱུགས་ལན་སྤྲོད་དགོས།
2026ལོ་ནི་ལོ་ལྔའི་འཆར་འགོད་བཅོ་ལྔ་པ་འགོ་རྩོམ་པའི་ལོ་ཡིན་ལ། འགོ་རྩོམ་ཤེས་མཁན་གྱིས་མཇུག་འབྲས་ལ་བསམ་བློ་གཏོང་ངེས་པ་དང་། མི་བྱས་པ་ཅན་གྱིས་ཇུས་བཟང་སྔོན་ནས་འདིང་ངེས། ང་ཚོས་དམིགས་འབེན་ལས་འགན་གཏན་འཁེལ་བྱས་ཏེ་ཡིད་ཆེས་བརྟན་པོ་དང་བབ་བསྟུན་འཕྲལ་བསྟུན་སྒོས། སྤུས་ལེགས་འཕེལ་རྒྱས་ལ་སྐུལ་འདེད་དང་སྔར་ལས་བཅོས་སྒྱུར་ཁྱོན་ཡོངས་ནས་ཟབ་སྤེལ་བྱས་ཏེ། དམངས་ཡོངས་ཐུན་མོང་ཕྱུག་འགྱུར་ལ་སྐུལ་འདེད་བཏང་ནས། ཀྲུང་གོའི་ངོ་མཚར་བའི་ལེའུ་གསར་པ་མུ་མཐུད་དུ་རྩོམ་དགོས།
ཕུགས་འདུན་ཆེན་པོ་སྙེག་སྐབས། ལམ་ཐག་རིང་བ་མི་ཚོར་ལ། མདུན་ལམ་ཀྱག་ཀྱོག་ཆེ་ཡང་། གོམ་ཞེང་ཆེན་པོས་བསྐྱོད་ཆོག ང་ཚོས་རྟ་རྒོད་ལྕག་གིས་སྐུལ་བའི་སྙིང་སྟོབས་བཅངས་བ་དང་། གྱི་ལིང་བང་རྩལ་འགྲན་པ་ལྟར་གྱི་གསོན་ཤུགས་འཕེལ་བར་བྱས་ནས། རྟ་མཆོག་བཞིན་རྒྱུག་མཚམས་མི་འཇོག་པའི་བརྩོན་སེམས་ཀྱིས་མཉམ་དུ་ཕུགས་འདུན་ཆེད་དུ་འབད་འཐབ་དང་། བདེ་སྐྱིད་ཀྱི་ཆེད་དུ་འབད་འབུངས་བྱས་ཏེ། རླབས་ཆེ་བའི་ཕུགས་འདུན་དེ་བདེ་སྐྱིད་ལྡན་པའི་དོན་དངོས་སུ་འགྱུར་བར་བྱེད་དགོས།
ལོ་གསར་གྱི་ཉི་གཞོན་འཆར་ལ་ཉེ། མེས་རྒྱལ་གྱི་རི་ཀླུང་མཛེས་ཤིང་ལྟ་ན་སྡུག། ས་གཞི་ཆེན་མོ་འབྱོར་ཕྱུག་དཔལ་དང་ལྡན། ཀྲུང་ཧྭའི་ས་གཞིར་སྐྱེ་སྟོབས་གསོན་ཤུགས་རྒྱས་པ་བཅས་ཀྱི་སྨོན་འདུན་ཞུ་རྒྱུ་དང་། ལྷན་རྒྱས་ཐུགས་བདེ་སེམས་སྐྱིད་དང་མཛད་འཕྲིན་གོང་འཕེལ། བསམ་དོན་ལྷུན་གྱིས་འགྲུབ་པའི་སྨོན་འདུན་ཞུ་རྒྱུ་ཡིན།
