མཚོ་སྔོན་ཞིང་ཆེན་མི་དམངས་སྲིད་གཞུང་དྲ་བ།
ཟླ11པའི་ཚེས26ཉིན། ཞིང་ཆེན་དམངས་ཆེན་སྐབས་བཅུ་བཞི་པའི་རྒྱུན་ལས་ཨུ་ཡོན་ལྷན་ཁང་གི་གྲོས་ཚོགས་ཐེངས་བཅོ་བརྒྱད་པའི་སྟེང《མཚོ་སྔོན་ཞིང་ཆེན་གྱི་ཡིག་ཚགས་སྲོལ་ཡིག》 བརྡས་ཐག་བཅད་དེ་གྲོས་འཆམ་བྱུང་བ་དང་། 2026ལོའི་ཟླ2པའི་ཚེས1ཉིན་ནས་བཟུང་ལག་བསྟར་བྱ་རྒྱུ་རེད། སྲོལ་ཡིག་ཁྱབ་བསྒྲགས་དང་ལག་བསྟར་བྱས་པ་དེས་རང་ཞིང་གི་ཡིག་ཚགས་བྱ་བ་ཁྲིམས་ལྟར་དོ་དམ་དང་སྒོ་འབྱེད་མཉམ་སྤྱོད། དེང་རབས་ཅན་འཕེལ་རྒྱས་བཅས་ཀྱི་དུས་རིམ་གསར་བར་སླེབས་པ་མཚོན།
སྲོལ་ཡིག་ལ་བསྡོམས་པས་ལེའུ་བརྒྱད་དང་དོན་ཚན་སོ་གསུམ་ཡོད་ལ། གཙོ་བོ་མདོར་བསྟན་དང་། ཡིག་ཚགས་ལས་ཁུངས་དང་དེའི་ལས་འགན། ཡིག་ཚགས་ཀྱི་དོ་དམ། ཡིག་ཚགས་ཀྱི་བེད་སྤྱོད། ཡིག་ཚགས་ཆ་འཕྲིན་ཅན་གྱི་འཛུགས་སྐྲུན། ལྟ་སྐུལ་ཞིབ་བཤེར། ཁྲིམས་ལུགས་འགན་འཁྲི་དང་ཟུར་བཀོད་བཅས་འདུས་ཡོད། མཚོ་སྔོན་གྱི་དངོས་ཡོད་ལ་རྐང་བཙུགས་པ་དང་། ཡིག་ཚགས་བྱ་བའི་སྤུས་ཚད་མཐོ་བའི་འཕེལ་རྒྱས་ཀྱི་བླང་བྱར་དམ་པོར་དམིགས་ཏེ། གོང་རིམ་བཅའ་ཁྲིམས་ཀྱི་གཏན་འབེབས་དང་སྦྲེལ་མཐུད་བྱས་པར་མ་ཟད། ས་གནས་ཀྱི་ཁྱད་ཆོས་འབུར་དུ་ཐོན་ཡོད།
སྲོལ་ཡིག་ལས། རིམ་པ་སོ་སོའི་མི་དམངས་སྲིད་གཞུང་གིས་ཡིག་ཚགས་བྱ་བར་ཤུགས་སྣོན་པ་དང་། ཡིག་ཚགས་བྱ་བའི་འགོ་ཁྲིད་ཀྱི་འགན་འཁྲིའི་ལམ་ལུགས་འཛུགས་དགོས་ལ། ལས་ཁུངས་དང་ཚོགས་པ། ཁེ་ལས་དང་ལས་དོན་སྡེ་ཁག དེ་མིན་རྩ་འཛུགས་གཞན་པ་བཅས་ཀྱི་ཡིག་ཚགས་བྱ་བའི་འགན་འཁྲིའི་ལམ་ལུགས་འཛུགས་དགོས། རིམ་པ་སོ་སོའི་ཡིག་ཚགས་གཙོ་གཉེར་སྡེ་ཁག་དང་ཡིག་ཚགས་ཁང་། ལས་ཁུངས། ཚོགས་པ། ཁེ་ལས་དང་ལས་དོན་སྡེ་ཁག དེ་མིན་རྩ་འཛུགས་གཞན་པ་བཅས་ཀྱི་ལས་འགན་གཏན་འཁེལ་བྱས་ཏེ། ཡུལ་ཚོ་དང་གྲོང་རྡལ་མི་དམངས་སྲིད་གཞུང་དང་སྲང་ལམ་ལས་སྒྲུབ་ཁང་། རིགས་མི་འདྲ་བའི་བྱེད་ནུས་ཁུལ་གྱི་དོ་དམ་ལས་ཁུངས་དང་། ཆོས་ལུགས་ཀྱི་བྱེད་སྒོ་སྤེལ་ཡུལ་གྱི་དོ་དམ་རྩ་འཛུགས་བཅས་ཀྱི་བྱ་བའི་ལས་འགན་གཏན་འབེབས་ཞིབ་ཕྲ་བྱས། དེ་དང་མཉམ་དུ། སྡེ་བ་དང་སྡེ་ཁུལ་གྱིས་ཡིག་ཚགས་གསར་སྤེལ་བེད་སྤྱོད་བྱེད་པར་དེར་བསྟུན་གྱི་གཏན་འབེབས་བྱས་ཏེ། ཆ་རྐྱེན་ཡོད་པའི་སྡེ་བ་དང་སྡེ་ཁུལ་གྱིས་སྡེ་བའི་ལོ་རྒྱུས་དང་སྡེ་ཁུལ་གྱི་ལོ་རྒྱུས། གནའ་རྫས་འགྲེམ་སྟོན་སོགས་ཀྱི་བྱེད་ཐབས་བརྒྱུད་དེ། ཡིག་ཚགས་ཐོན་ཁུངས་གསར་སྤེལ་དང་བེད་སྤྱོད་བྱེད་པར་སྐུལ་མ་གཏོང་དགོས་པ་གཏན་འབེབས་གསལ་བོ་བྱས།
སྲོལ་ཡིག་ལས་ཡིག་ཚགས་ཆ་འཕྲིན་ཅན་གྱི་འཛུགས་སྐྲུན་ཞེས་པའི་ཆེད་དམིགས་ལེའུ་བཀོད་སྒྲིག་བྱས་ཡོད་དེ། རྫོང་རིམ་པ་ཡན་གྱི་མི་དམངས་ཁྲིམས་ཁང་དང་། ཡིག་ཚགས་ཁང་དང་ལས་ཁུངས། ཚོགས་པ། ཁེ་ལས་དང་ལས་དོན་སྡེ་ཁག རྩ་འཛུགས་གཞན་པ་བཅས་ཀྱི་ཡིག་ཚགས་ཆ་འཕྲིན་ཅན་གྱི་བྱ་བའི་ཁྲོད་ཀྱི་ལས་འགན་གཏན་འབེབས་གསལ་བོ་བྱས་པ་དང་། གློག་རྡུལ་ཡིག་ཚགས་དང་གཞི་གྲངས་ཡིག་ཚགས་ཁང་འཛུགས་སྐྲུན་སོགས་ཀྱི་ནང་དོན་གཏན་འཁེལ་གསལ་བོ་བྱས།
དེ་དང་མཉམ་དུ། རང་ཞིང་གི་ཡིག་ཚགས་བྱ་བའི་དངོས་ཡོད་གནས་ཚུལ་དང་ཟུང་འབྲེལ་བྱས་ཏེ། གཙོ་གནད་ཡིག་ཚགས་དང་། དམར་པོའི་ཡིག་ཚགས། བྱ་འགུལ་གལ་ཆེན། གློ་བུར་དོན་རྐྱེན་བཅས་ཀྱི་ཡིག་ཚགས་ཀྱི་ལྟ་སྐུལ་དོ་དམ་ཐད་གཏན་འབེབས་བྱས།
