མཚོ་སྔོན་ཞིང་ཆེན་མི་དམངས་སྲིད་གཞུང་དྲ་བ།
129ཏང་གི་སྐབས་ཉི་ཤུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་བཞི་པའི་ཐོག གྲོང་ཁྱེར་གྱི་ནང་གནས་འཕེལ་རྒྱས་རྒྱུན་འཁྱོངས་དང་། གྲོང་ཁྱེར་གསར་སྒྱུར་ལག་བསྟར་ནན་མོ་བྱ་དགོས་ཞེས་བཏོན། ཐེན་ཅིན་དང་ཧྲན་ཞི་ཡིས་ཚང་འཛོམས་གྲོས་ཚོགས་ཀྱི་དགོངས་དོན་ལག་བསྟར་མཐར་ཕྱིན་བྱས་པ་དང་། གྲོང་ཁྱེར་གསར་སྒྱུར་དེ་འགོ་རྩོམ་སར་འཛིན་པའི་རྒྱུན་བསྐྱངས་ནས་དམངས་འཚོར་ཕན་པ་དང་ཆད་པ་ཁ་གསབ། འཕེལ་རྒྱས་ལ་སྐུལ་བ་བཅས་ལ་ཤུགས་བསྣན། གྲོང་ཁྱེར་གྱི་བྱེད་ནུས་ཆགས་སྟངས་བསྟུད་མར་ལེགས་བསྒྱུར་བྱས་ཏེ། མི་དམངས་ཀྱི་འཚོ་བའི་སྤུས་ཚད་མཐོ་རུ་བཏང་།
ཐེན་ཅིན་གྱིས་གྲོང་ཁྱེར་གསར་སྒྱུར་གང་མགྱོགས་བྱས་ནས་དམངས་ཀྱི་འཚོ་བར་སྔར་ལས་སྤུས་ཚད་ལྡན་པར་བྱས།
གྲོང་མིའི་སྤྲོ་གསེང་བྱ་ཡུལ་འདི་རུ་ཉིན་རེར་མི་མང་པོ་ཡོང་བཞིན་ཡོད། དེ་སྔ་གནས་འདི་ནི་བེད་མེད་དུ་བསྐྱུར་བའི་ཐེན་ཅིན་འཁོར་སྟེགས་དང་པོའི་སྤྱི་ཁྱབ་བཟོ་གྲྭའི་གནས་ཡུལ་རྙིང་པ་ཡིན། གྲོང་ཁྱེར་གསར་སྒྱུར་གྱི་གོ་རིམ་ཁྲོད། ཐེན་ཅིན་གྲོང་ཁྱེར་གྱིས་དེ་གའི་བཟོ་བཀོད་རྙིང་པ22སོར་བཞག་བྱས་ཏེ། སྒོ་འབྱེད་ཅན་གྱི་སྤྱི་གླིང་བསྐྲུན་པ་མ་ཟད། ད་དུང་རིག་གནས་གསར་གཏོད་ཀྱི་བར་སྟོང་དང་རྟེན་མཛོད་ཁང་། ལས་གཏོད་སྲང་ཁུལ་སོགས་ལས་རྣམ་གསར་པ་ནང་འདྲེན་བྱས་ཡོད།
ཐེན་ཅིན་གྲོང་ཁྱེར་ཧོ་ཏུང་ཆུས་དངུལ་གཏོང་སྐུལ་སྤེལ་ཅུའུ་ཡི་ལས་སྒྲུབ་མི་སྣ་ཧྲི་ཕེ་ཁའེ་ཡིས་བཤད་རྒྱུར། ཏང་གི་སྐབས་ཉི་ཤུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་བཞི་པས་ང་ཚོར་ཁ་ཕྱོགས་གསལ་སྟོན་བྱས། ང་ཚོས་ནང་གནས་འཕེལ་རྒྱས་ལམ་བུའི་རྒྱུན་སྐྱོང་དགོས། བེད་མེད་ཐོན་ཁུངས་བེད་སྤྱོད་ཡག་པོ་བྱས་ནས་གྲོང་ཁྱེར་ལ་གསོན་ཤུགས་མང་པོ་བསྩོལ་དགོས་ལ། མི་དམངས་མང་ཚོགས་ཀྱི་ཐོབ་སྣང་དང་སྐྱིད་སྣང་། བདེ་སྣང་བཅས་བསྟུད་མར་ཆེ་རུ་གཏོང་དགོས།
“ལོ་ལྔའི་འཆར་འགོད་བཅུ་བཞི་པའི”སྐབས་སུ། ཐེན་ཅིན་གྱིས་བསྡོམས་པས་ཡུག་ཁུལ་རིགས་ཀྱི་གྲོང་ཁྱེར་གསར་སྒྱུར་རྣམ་གྲངས49སྤེལ་བ་དང་། གྲོང་ཁྱེར་དང་གྲོང་རྡལ་གྱི་གཞིས་ཁུལ་རྙིང་བ1061སྒྱུར་བཀོད་བྱས་ཏེ། གྲོང་མི་ཁྱིམ་ཚང་ཧ་ལམ་འབུམ་ལྔ་དང་ཁྲི་གསུམ་ལ་ཕན་བདེ་བསྐྲུན། ཀྲུང་ཨུ་ཚང་འཛོམས་གྲོས་ཚོགས་ཐེངས་བཞི་པའི་དགོངས་དོན་དོན་འཁྱོལ་མཐར་ཕྱིན་བྱེད་པ་དང་། རིམ་པ་རྗེས་མར། ཐེན་ཅིན་གྱིས་གྲོང་ཁྱེར་གསར་སྒྱུར་གྱི་སྲོལ་ཡིག་གཏན་འབེབས་བྱས་ཏེ། གྲོང་ཁྱེར་གསར་སྒྱུར་གྱི་ཆེད་དོན་འཆར་འགོད་བཟོས་ནས་ལག་བསྟར་བྱེད་པ་དང་། གྲོང་ཁྱེར་གྱི་དམངས་ཕན་འཚོ་བའི་མུ་ཁྱུད་འཐུས་ཚང་དུ་གཏོང་དགོས། རིག་གནས་དང་ཡུལ་སྐོར་ཐོན་ལས་ལ་བརྟེན་ནས་གྲོང་ཁྱེར་གསར་སྒྱུར་བྱ་རྒྱུར་སྐུལ་ནས་གྲོང་ཁྱེར་འཕེལ་རྒྱས་ཀྱི་བར་སྟོང་རྒྱུན་མི་ཆད་པར་ལེགས་བསྒྱུར་བྱ་དགོས།
ཐེན་ཅིན་གྲོང་ཁྱེར་སྡོད་ཁང་འཛུགས་སྐྲུན་ཨུ་ཡོན་ལྷན་ཁང་གི་རིམ་པ་གཉིས་པའི་སྐོར་ཞིབ་པ་ཝང་ཞང་ཡུས་ཀྱིས་བཤད་རྒྱུར། ལོ་ལྔའི་འཆར་འགོད་བཅོ་ལྔ་པར་རྒྱང་ལྟ་བྱས་ཚེ། ང་ཚོས་ཏང་གི་སྐབས་ཉི་ཤུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་བཞི་པའི་དགོངས་དོན་མཛུབ་སྟོན་དུ་བཟུང་སྟེ། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཐེན་ཅིན་དུ་གཟིགས་ཞིབ་གནང་སྐབས་ཀྱི་གསུང་བཤད་གལ་ཆེན་གྱི་དགོངས་དོན་ལག་བསྟར་དོན་འཁྱོལ་བྱ་ངེས། གསར་བསྒྱུར་ལས་འགན་ལྟར་རིགས་བགར་ནས་གསར་བསྒྱུར་ཐབས་ཇུས་འདོན་པ་དང་། གྲོང་ཁྱེར་གསར་སྒྱུར་རྣམ་གྲངས་གསོག་འཇོག་མཛོད་ཁང་བཙུགས་ནས། གསར་གཏོད་དང་བདེ་སྡོད། མཛེས་སྡུག མཉེན་ཤུགས། དཔལ་ཡོན། བློ་གྲོས་བཅས་འཛོམས་པའི་དེང་རབས་ཅན་གྱི་མི་དམངས་གྲོང་ཁྱེར་ཞིག་བསྐྲུན་རྒྱུ་ཡིན་ཟེར།
ཧྲན་ཞི་ཐའེ་ཡོན་གྱིས་གྲོང་ཁྱེར་གསར་སྒྱུར་ཤུགས་ཆེན་བྱས་ནས་དམངས་ཀྱི་འཚོ་བ་སྔར་ལས་མཛེས་སྡུག་ལྡན་པར་བྱས།
ཐེན་ཁྲེན་ལམ་ནི་ཧྲན་ཞི་ཐའེ་ཡོན་གྲོང་ཁུལ་གྱི་ཤར་རྒྱུད་དུ་གནས་པ་དང་། ས་དེའི་མང་ཚོགས་ཕྱིར་སྐྱོད་པའི་བགྲོད་ལམ་གཙོ་བོའང་རེད། འོན་ཀྱང་དེ་སྔ་ལམ་ངོས་ཅུང་དོག་ལ་གཟར་ཚད་ཀྱང་ཆེ། དེ་མིན་ལམ་གྱི་གནས་ཚུལ་ཡང་ཡག་པོ་མིན་སྟབས། མཐའ་འཁོར་གྱི་གྲོང་མི་ཁྲི་གཉིས་ལྷག་གི་ཕྱིར་སྐྱོད་དཀའ་གནད་དུ་གྱུར་ཡོད། ཐའེ་ཡོན་གྲོང་ཁྱེར་གྱིས་ལམ་འདིའི་བསྒྱུར་བཀོད་དེ་གྲོང་ཁྱེར་གསར་བསྒྱུར་དང་སྲང་ལམ་ཆུང་བ་བསྒྱུར་བཀོད་ཀྱི་བཟོ་སྐྲུན་གཙོ་བོའི་གྲས་ཞིག་ཏུ་བརྩིས་ཡོད། ཉིན་འདི་གར། ཐེན་ཁྲེན་གཞུང་ལམ་གྱི་བསྒྱུར་བཀོད་བཟོ་སྐྲུན་མཇུག་སྒྲིལ་ལ་ཉེ། སྔོན་རྩིས་ལྟར་ན་ལོ་མཇུག་གི་སྔོན་ལ་རླངས་འཁོར་ཤར་གཏོང་ཐུབ་རྒྱུ་རེད།
ཧྲན་ཞི་ཞིང་ཆེན་ཐའེ་ཡོན་གྲོང་ཁྱེར་གྱི་གྲོང་ཁྱེར་དང་གྲོང་གསེབ་ཀྱི་རྨང་གཞིའི་སྒྲིག་བཀོད་འཛུགས་སྐྲུན་ལྟེ་གནས་ཀྱི་རྣམ་གྲངས་བཀོད་འདོམས་པ་ལིའུ་ཡ་མིན་གྱིས་བཤད་རྒྱུར། བསྒྱུར་བཀོད་བྱས་རྗེས་ཕྱོགས་གཉིས་ཀྱི་འཁོར་ལམ་བཞི་ཡོད། འཕྲུལ་སྒུལ་མིན་པའི་ལམ་དང་མིའི་འགྲོ་ལམ་ལོགས་སུ་དབྱེ་ཡོད། འགྲོ་ལམ་སྒྱུར་བཀོད་བྱས་པ་དང་ཆབས་ཅིག ཉེ་འཁོར་གྱི་གྲོང་མིའི་ཕྱིར་སྐྱོད་དཀའ་བ་དང་འགྲོ་སྐྱོད་བདེ་འཇགས་མིན་པའི་གནད་དོན་ཡང་རྩ་བ་ནས་ཐག་གཅོད་ཐུབ་རྒྱུ་རེད།
“ལོ་ལྔའི་འཆར་འགོད་བཅུ་བཞི་པའི”སྐབས་སུ། ཐའེ་ཡོན་གྱིས་གྲོང་ཁྱེར་གྱི་གཞུང་ལམ་སྤྱི་ལེ125.8གསར་སྐྲུན་རྒྱས་སྐྲུན་བྱས་པ་དང་། གཞིས་ཁུལ་རྙིང་པ2932བསྒྱུར་བཀོད་བྱས་ལ། སྡོད་དམངས་ཁྱིམ་ཚང་འབུམ་ལྔ་དང་ཁྲི་བཞི་སྟོང་ལྔ་དང་འབྲེལ་བ་ཡོད། དེ་དང་ཆབས་ཅིག ཁུག་མའི་སྤྱི་གླིང240གསར་སྐྲུན་རྒྱས་སྐྲུན་བྱས་ནས་མཛེས་སྡུག་ལྡན་པའི་གྲོང་ཁྱེར་གྱི“བར་སྟོང་ཆུང་གྲས”སུ་གྱུར་ཡོད། ཀྲུང་ཨུ་ཚང་འཛོམས་གྲོས་ཚོགས་ཐེངས་བཞི་པའི་དགོངས་དོན་དོན་འཁྱོལ་མཐར་ཕྱིན་བྱེད་པར་ཧྲན་ཞི་ཡིས་གྲོང་ཁྱེར་གསར་བསྒྱུར་ཤུགས་ཆེན་བྱས་ནས་ད་ཡོད་ཀྱི་བཟོ་བཀོད་བསྒྱུར་བཀོད་དང་བེད་སྤྱོད་ལ་ཤུགས་བསྣན་ནས། གཞིས་ཁུལ་རྙིང་བ་སྒྱུར་བཀོད་བྱས་ནས་མཁར་སྡེ་ཧྲིལ་བོའི་འཛུགས་སྐྲུན་གྱི་ཚོད་ལྟའི་ས་ཚིགས་ཀྱི་བྱ་བ་གོ་རིམ་ལྡན་པའི་ངང་སྤེལ། གྲོང་ཁྱེར་གྱི་རྨང་གཞིའི་སྒྲིག་བཀོད་བསྟུད་མར་འཐུས་ཚང་དུ་བཏང་ནས་གྲོང་ཁྱེར་གྱི་སྐྱེ་ཁམས་སླར་གསོ་དང་། གྲོང་ཁྱེར་གྱི་སྤུས་ཚད་མཐོ་བའི་འཕེལ་རྒྱས་མངོན་འགྱུར་བྱེད་པར་སྐུལ་རྒྱུ་རེད།
ཧྲན་ཞི་ཞིང་ཆེན་ཐའེ་ཡོན་གྲོང་ཁྱེར་སྡོད་ཁང་དང་གྲོང་ཁྱེར་གྲོང་གསེབ་འཛུགས་སྐྲུན་ཅུའུ་ཡི་ཅུའུ་ཀྲང་ཚའོ་ཅུས་ཀྱིས་བཤད་རྒྱུར། ང་ཚོས“གཏན་ཕབ་གཉིས”ཀྱི་ཐག་གཅོད་རང་བཞིན་གྱི་དོན་སྙིང་ལ་གོ་བ་ཟབ་མོ་ལེན་པ་དང་། “སྲུང་སྐྱོང་གཉིས”མཐའ་གཅིག་ཏུ་བསྒྲུབ་དགོས། ལོ་ལྔའི་འཆར་འགོད་བཅོ་ལྔ་པར་རྒྱང་ལྟ་བྱས་ཚེ། ང་ཚོས་གྲོང་ཁྱེར་བརྟག་དཔྱད་དང་གྲོང་ཁྱེར་གསར་སྒྱུར་གཞི་གཅིག་ཅན་དུ་སྤེལ་བའི་རྒྱུན་སྐྱོང་དགོས། གྲོང་ཁྱེར་གྱི་ལོ་རྒྱུས་རིག་གནས་ཀྱི་འབྱུང་རྩ་དང་རྣམ་པའི་ཁྱད་ཆོས་ལ་སྲུང་སྐྱོང་ཡག་པོ་བྱས་ཏེ། གྲོང་ཁྱེར་གྱི་བྱེད་ནུས་འཐུས་ཚང་དང་གྲོང་ཁྱེར་གྱི་སྤུས་ཀ་མཐོར་འདེགས། དམངས་འཚོའི་དངོས་དོན་ལེགས་པར་བསྒྲུབ་དགོས།
