མཚོ་སྔོན་ཞིང་ཆེན་དམངས་ཆེན་བྱ་བའི་ཞིབ་འཇུག་ཁང་གིས“ཤུགས་ཆེན་པོས་དམངས་ཆེན་གྱི‘ལས་ཁུངས་བཞི’འཛུགས་པར་སྐུལ་འདེད་བཏང་།

 

ཟླ11པའི་ཚེས27ཉིན།  མཚོ་སྔོན་ཞིང་ཆེན་དམངས་ཆེན་བྱ་བའི་ཞིབ་འཇུག་ཁང་གིས་གྲོས་ཚོགས་བསྡུས་ཏེ“ཤུགས་ཆེན་པོས་དམངས་ཆེན་གྱི‘ལས་ཁུངས་བཞི’འཛུགས་པར་སྐུལ་འདེད་དང་།  འབད་པས་དུས་རབས་གསར་བའི་དམངས་ཆེན་བྱ་བའི་རྣམ་པ་གསར་བ་བཏོད་པར”ཞིབ་འཇུག་གྲོས་ཚོགས་བསྡུས། ཞིང་ཆེན་དམངས་ཆེན་ལས་ཁུངས་ཀྱི་ཁྲུའུ་རིམ་པ་ཡན་གྱི་འགོ་ཁྲིད་ལས་བྱེད་པ་གྲོས་ཚོགས་སུ་ཞུགས།

གྲོས་ཚོགས་ལས་ཏང་གི་སྐབས་བཅུ་བཞི་བའི་ཀྲུང་ཨུ་ཚང་འཛོམས་གྲོས་ཚོགས་ཐེངས་བཞིའི་དགོངས་དོན་དང་།  ཨུ་ཡོན་ཀྲང་ཀྲའོ་ལི་ཅིས་ཡིས་མཚོ་སྔོན་དུ་གཟིགས་ཞིབ་བྱེད་སྐབས་ཀྱི་གསུང་བཤད་གལ་ཆེན་གྱི་འབྲེལ་ཡོད་བླང་བྱ་ཞིང་ཆེན་ཏང་ཨུས་དོན་འཁྱོལ་བྱས་པ་བརྒྱུད་བསྒྲགས་བྱས་པ་དང་།  མཚོ་ཤར་གྲོང་ཁྱེར་གྱི་དམངས་ཆེན་དང་མཚོ་ལྷོ་བོད་རིགས་རང་སྐྱོང་ཁུལ་གྱི་དམངས་ཆེན།  མཚོ་བྱང་བོད་རིགས་རང་སྐྱོང་ཁུལ་གྱི་དམངས་ཆེན། ཡུས་ཧྲུའུ་བོད་རིགས་རང་སྐྱོང་ཁུལ་གྱི་དམངས་ཆེན་དང་ཞིང་ཆེན་ཏང་ཨུའི་ནོར་སྲིད་ཨུ་ཡོན་ལྷན་ཁང་།  བསླབ་ཚན་རིག་གནས་འཕྲོད་བསྟེན་ཨུ་ཡོན་ལྷན་ཁང་།  བཙོན་ཁང་དོ་དམ་ཨུ་ཡོན་ལྷན་ཁང་།  རྒྱུན་ལས་ཨུ་ཡོན་ལྷན་ཁང་གི་འཐུས་མི་ཨུ་ཡོན་ལྷན་ཁང་བཅས་ཀྱི་འགན་ཁུར་བློ་མཐུན་གྱིས་གྲོས་ཚོགས་ཀྱི་བརྗོད་གཞི་གཞིར་བཟུང་ནས་བརྗེ་རེས་དང་གཏམ་བཤད་བྱས།

གྲོས་ཚོགས་ཀྱིས་གྲོང་ཁྱེར་དང་ཁུལ་གྱི་དམངས་ཆེན་དང་ཞིང་ཆེན་གྱི་ཆེད་དོན་ལས་དོན་ཨུ་ཡོན་ལྷན་ཁང་སོ་སོའི་ཁྱད་ཆོས་ལྡན་པའི་བྱ་བ་དག་ལ་རིམ་བཞིན་དཔྱད་བརྗོད་སྤེལ།  མཚོ་སྔོན་ཞིང་ཆེན་དམངས་ཆེན་བྱ་བའི་ཞིབ་འཇུག་གྲོས་ཚོགས་ཀྱི་སྐབས་བརྗེ་ནས་བཟུང་།  ངེས་གནས་སྔར་བས་གནད་ཁེལ་དང་།  བརྗོད་གཞི་སྔར་བས་གཅིག་བསྡུས།  ལག་ལེན་སྔར་བས་ཕུན་སུམ་ཚོགས་པ་བཅས་བྱས་ཏེ།  འཕེལ་རྒྱས་ཀྱི་སྤྱི་ཁོག་དང་དམངས་ཆེན་གྱི་དངོས་ཡོད་ལ་གཞི་བཙུགས་ནས།  ཏན་ཏིག་གིས་ལོ་ལྔའི་འཆར་འགོད་བཅོ་ལྔ་བའི་འཕེལ་རྒྱས་ཀྱི་རྣམ་པའི་ཁྲོད་མཉམ་འདྲེས་བྱེད་པའི་རང་རྟོག་རང་འགུལ་ཆེར་བསྐྱེད་བྱེད་པ་དང་། ཞིབ་འཇུག་རྒྱས་བཤད་གཏིང་ཟབ་བྱས་ཏེ‘ལས་ཁུངས་བཞི’འཛུགས་སྐྲུན་བྱེད་པའི་གཙོ་གནད་འགན་འཁྲི་ཇེ་དྲག་ཏུ་གཏོང་བ།  འདོན་སྤྲོད་ཀྱི་སྤུས་ཚད་ལེགས་བསྒྱུར་བྱས་ཏེ།  གྲུབ་འབྲས་ཚུལ་སྒྱུར་གྱི“མཇུག་མཐའི་སྤྱི་ལེ་གཅིག”ཤར་གཏོང་བྱེད་པ།  ཕྱོགས་སོ་སོའི་སྟོབས་ཤུགས་གཅིག་བསྡུས་བྱས་ཏེ།  མཐུན་སྦྱོར་མཉམ་འགུལ་གྱི་ཞིབ་འཇུག་བྱ་བའི་རྣམ་པ་སྐྲུན་དགོས།  ཆབ་སྲིད་ཀྱི་ཁ་ཕྱོགས་རྒྱུན་འཁྱོངས་དང་། གཞུང་ལུགས་ཀྱི་ཁྲིད་ཕྱོགས་འབུར་དུ་ཐོན་པ།  བྱ་བའི་སྟོན་ཕྱོགས་ཆེར་བསྐྱེད་བྱེད་པ་བཅས་བྱས་ཏེ།  དུས་རབས་གསར་བའི་མཚོ་སྔོན་དམངས་ཆེན་བྱ་བའི་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་དང་ཀྲུང་གོའི་ལུགས་ཀྱི་དེང་རབས་ཅན་གྱི་མཚོ་སྔོན་ལག་ལེན་ལ་སྐུལ་འདེད་གཏོང་བར་བློ་གྲོས་དང་སྟོབས་ཤུགས་འབུལ་དགོས་པར་བསྟན།