མཚོ་སྔོན་ཞིང་ཆེན་མི་དམངས་སྲིད་གཞུང་དྲ་བ།
མཚོ་སྔོན་གསར་འགྱུར་དྲ་བའི་འཕྲིན། ཟླ་པའི9ཚེས24ཉིན། མཚོ་སྔོན་ཞིང་ཆེན་གྱི་མི་དམངས་འཐུས་ཚོགས་ཆེན་སྐབས་བཅུ་བཞི་པའི་རྒྱུན་ལས་ཨུ་ཡོན་ལྷན་ཁང་གི་གྲོས་ཚོགས་ཐེངས་བཅུ་བདུན་པའི་ཐོག་གསར་དུ་བཟོ་བཅོས་བརྒྱབ་པའི《མཚོ་སྔོན་ཞིང་ཆེན་གྱི་རྒན་རྒོན་གྱི་ཁེ་དབང་འགན་སྲུང་སྲོལ་ཡིག》(གཤམ་དུ་《སྲོལ་ཡིག》ཞེས་བསྡུ་རྒྱུ)བརྡས་ཐག་བཅད་ནས་གྲོས་འཆམ་བྱུང་བ་དང་། 《སྲོལ་ཡིག》དེ2025ལོའི་ཟླ12ཚེས1ཉིན་ནས་དངོས་སུ་ལག་བསྟར་བྱ་རྒྱུ་རེད། ཟླ11པའི་ཚེས27ཉིན་ཞིང་ཆེན་མི་དམངས་འཐུས་ཚོགས་རྒྱུན་ལས་ཨུ་ཡོན་ལྷན་ཁང་གིས་གསར་འགྱུར་ཡོངས་སྒྲོག་ཚོགས་འདུ་འཚོགས་ནས《སྲོལ་ཡིག》བཟོ་བཅོས་བརྒྱབ་པའི་རྒྱབ་ལྗོངས་དང་། བརྒྱུད་རིམ། དོན་སྙིང་། ནང་དོན་གཙོ་བོ་བཅས་གསལ་འགྲེལ་ཞིབ་ཕྲ་བྱས།
ཐེངས་འདིའི་བཟོ་བཅོས་བརྒྱབ་པའི་དམིགས་ཡུལ་ནི་མི་འབོར་རྒས་འགྱུར་ཅན་ལ་གྱི་གནད་དོན་དམིགས་སུ་བཟུང་སྟེ། ་རྒན་རྒོན་གྱི་བྱ་གཞག་འཕེལ་རྒྱས་ཀྱི་བླང་བྱ་གསར་པ་དང་འཚམ་པོ་བཟོས་ཡོད། བཟོ་བཅོས་བརྒྱབ་རྗེས《སྲོལ་ཡིག》གི་ནང་དོན་ནིདེ་སྔའི་ལེའུ5དང་དོན་ཚན38ནས་ལེའུ8དང་དོན་ཚན55རུ་བཟོས་པ་དང་། ། ནང་དོན་ལ་ཁྱོན་ཡོངས་དང་དམིགས་ས་རང་བཞིན་སྔར་བས་ཇེ་ཆེར་ཕྱིན་ཡོད།
ཁྱིམ་ནས་རྒན་གསོ་བྱེད་པའི་རྨང་གཞི་སྔར་ལས་སྲ་བརྟན་དུ་བཏང་པ།
《སྲོལ་ཡིག》ནང་དུ“བུ་ཕྲུག་གི་ལྟ་སྐྱོང་གུང་གསེང”གསར་དུ་བསྣན་ཡོད་པ་སྟེ། རྒན་རྒོན་ལ་ནད་བྱུང་ནས་སྨན་ཁང་དུ་སྡོད་སྐབས་བུ་ཁེར་སྐྱེས་ལ་ལོ་རེར་ཉིན་ཉི་ཤུ་རིང་གི་ལྟ་སྐྱོང་གནང་བ་སྟེར་དགོས་པ་དང་། བུ་ཁེར་སྐྱེས་མིན་པ་ལ་ལོ་རེར་བསྡོམས་པས་ཉིན་བཅུ་ཡི་ལྟ་སྐྱོང་གནང་བ་ཡོད་པ་གཏན་ཁེལ་གསལ་བོ་བྱས་ཡོད། དེ་དང་ཆབས་ཅིག་རྒན་རྒོན་གྱི་སྡོད་ཁང་སོགས་རྒྱུ་ནོར་གྱི་ཁེ་དབང་སྲུང་སྐྱོང་བྱེད་ཤུགས་ཇེ་ཆེར་བཏང་སྟེ་བུ་ཕྲུག་སམ་ཡང་ན་གཉེན་ཉེ་ཡིས་རྒྱུ་ནོར་བཙན་བཟུང་བྱེད་མི་ཆོག་པ་མ་ཟད། འབྲེལ་ཡོད་ལས་ཁུངས་ཀྱིས་རྒན་རྒོན་གྱི་རྒྱུ་ནོར་ཐག་གཅོད་བྱེད་སྐབས་ཁོང་ཚོའི་འདོད་བློ་ངོ་མ་དེ་ཁོ་རང་གི་འདོད་བློ་ཡིན་མིན་ལ་གསལ་བོ་ཐོ་གཏུག་དགོས་པའི་བླང་བྱ་བཏོན་ཡོད།
སྤྱི་ཚོགས་འགན་སྲུང་གི་ཆུ་ཚད་སླར་ཡང་ཇེ་མཐོར་བཏང་བ།
ཕན་བདེ་འགན་སྲུང་ཐད་འགྱུར་ལྡོག་མངོན་གསལ་ཡོད་པ་སྟེ། ལོ་བགྲེས་་ཕོགས་སྣོན་དེ་ལོ70ནས་སྟེར་རྒྱུ་བྱས་ཡོད་པས་རྒན་རྒོན་མང་པོ་ཞིག་གིསསྔ་མོ་ནས་ལོངས་སུ་སྤྱོད་ཐུབ་རྒྱུ་རེད། 《སྲོལ་ཡིག》ནང་དུ། ཡུན་རིང་བདག་སྐྱོང་གི་འགན་སྲུང་ལམ་ལུགས་བཙུགས་ཏེ། དཔལ་འབྱོར་ཀྱི་འཁོས་ཀ་ཞན་པའི་་ནུས་ཤོར་རྒན་རྒོན་ཚོར་བདག་སྐྱོང་ཁ་གསབ་སྟེར་དགོས་པའི་བླང་བྱ་བཏོན་ཡོད། རྒན་རྒོན་གྱི་རྒྱུ་ནོར་བདེ་འཇགས་ལ་སྲུང་སྐྱོང་བྱ་ཆེད། རྒན་རྒོན་ལ་དམིགས་པའི་ཁ་བསླུས་དང་ཁྲིམས་འགལ་གྱིས་མ་དངུལ་བསྡུ་རུབ་སོགས་ཀྱི་བྱ་སྤྱོད་ལ་རྡུང་རྡེག་ནན་པོ་གཏོང་དགོས་པ་མ་ཟད། ཉེན་ཁའི་དྲན་སྐུལ་ལ་ཤུགས་སྣོན་བྱ་དགོས་པའི་བླང་བྱ་བཏོན་ཡོད།
སྤྱི་ཚོགས་ཞབས་ཞུའི་མཁོ་སྤྲོད་སྔར་ལས་ཇེ་ལེགས་སུ་གཏང་དགོས།
《སྲོལ་ཡིག》གི་ནང་དུ་གྲོང་ཁྱེར་དང་གྲོང་གསེབ་ལ་ཁྱབ་པའི་རྫོང་དང་། ཡུལ་ཚོ། གྲོང་ཚོ་བཅས་རིམ་པ་གསུམ་གྱི་རྒན་གསོ་ཞབས་ཞུའི་དྲ་རྒྱ་འཛུགས་དགོས་པ་མ་ཟད། སྨན་བཅོས་དང་རྒན་གསོ་ཟུང་འབྲེལ་ལ་སྐུལ་འདེད་ཤུགས་ཆེན་གཏང་དགོས། སྨན་བཅོས་ལས་ཁུངས་དང་རྒན་གསོ་ལས་ཁུངས་བར་གྱི་མཉམ་ལས་ལ་རྒྱབ་སྐྱོར་བྱས་ཏེ། རྒན་གསོ་ལས་ཁུངས་ནང་ཁུལ་དུ་སྨན་ཁང་འཛུགས་པར་སྐུལ་ལྕག་དང་། གཞུང་གཉེར་སྨན་བཅོས་ལས་ཁུངས་ཁག་ཅིག་བདེ་ཐང་ནད་སྐྱོང་གི་ལས་ཁུངས་སུ་བསྒྱུར་པར་རྒྱབ་སྐྱོར་བྱ་དགོས་པའི་བླང་བྱ་བཏོན་ཡོད། དུས་མཚུངས་སུ་སྤྱི་གཞུང་གི་ཚོགས་ར་དང་་དང་ཁྱིམ་ཚང་རྒན་འགྱུར་ལ་འཚམ་པའི་བསྒྱུར་བཀོད་ལ་སྐུལ་འདེད་བཏང་སྟེ། རྒན་རྒོན་ལ་མཛའ་མཐུན་ཁོར་ཡུག་བསྐྲུན་དགོས།
སྤྱི་ཚོགས་ཀྱི་གཟིགས་སྐྱོང་ནང་དོན་སླར་ཡང་རྒྱ་བསྐྱེད་པ།
ཡུལ་སྐོར་ལ་གཟིགས་སྐྱོང་བྱེད་པའི་ཕྱོགས་ནས། ལོ65ཡན་གྱི་རྒན་རྒོན་རིན་མེད་ཀྱིསགྲོང་ཁྱེར་གྱི་སྤྱི་སྤྱོད་རླངས་འཁོར་བསྡོད་ཆོག་པ་ཁ་གསལ་བཟོས་པ་མ་ཟད། ཆ་རྐྱེན་ཡོད་པའི་ས་གནས་ཀྱིས་གཟིགས་སྐྱོང་ཁྱབ་ཁོངས་རྒྱ་ཆེར་བསྐྱེར་པར་སྐུལ་མ་གཏོང་དགོས། རིག་གནས་སྤྲོ་གསེང་གི་ཕྱོགས་ནས། སྤྱི་པའི་རིག་གནས་སྒྲིག་བཀོད་དང་ཡུལ་སྐོར་མཛེས་ལྗོངས་ཁུལ་སོགས་ཀྱིས་རྒན་རྒོན་ལ་རིན་མེད་སམ་གཟིགས་སྐྱོང་ཡོད་པའི་སྒོ་ནས་སྒོ་འབྱེད་དགོས་པའི་གཏན་འབེབས་བྱས་ཡོད། གཞན་ཡང《སྲོལ་ཡིག》ནང་ད་དུང་རྒན་རྒོན་དག་མུ་མཐུད་དུ་སྤྱི་ཚོགས་ཀྱི་བྱེད་སྒོའི་ནང་ཞུགས་པར་རྒྱབ་སྐྱོར་བྱས་ནས་ཚ་ནུས་ལྷག་མ་འདོན་སྤེལ་དང་། ཤེས་ལྡན་མི་སྣ་རྒན་རྒོན་གྱི་ཆ་འཕྲིན་མཛོད་བཙུགས་ཏེ་རྒན་རྒོན་དག་ངལ་རྩོལ་བྱེད་སྒོར་ཞུགས་ཆོག་པའི་ཁྲིམས་མཐུན་ཁེ་དབང་ལ་འགན་ལེན་བྱ་དགོས་པའི་བླང་བྱ་བཏོན་ཡོད།
གསར་དུ་བཟོ་བཅོས་བརྒྱབ་པའི《མཚོ་སྔོན་ཞིང་ཆེན་གྱི་རྒན་རྒོན་གྱི་ཁེ་དབང་འགན་སྲུང་སྲོལ་ཡིག》མཚོ་སྔོན་གྱི་དོན་དངོས་དང་ཟུང་འབྲེལ་དམ་ཟབ་བྱས་ནས་རྒན་པའི་དོ་ཁུར་ལ་དོ་སྣང་བྱས་ཏེ། ། ཞིང་ཆེན་གང་དེའི་རྒན་རྒོན་གྱི་ཁྲིམས་མཐུན་ཁེ་དབང་འགན་སྲུང་དང་རྒན་རྒོན་གྱི་བྱ་གཞག་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་བར་ནུས་པ་གལ་ཆེན་ཐོན་རྒྱུ་རེད།
