མཚོ་སྔོན་ཞིང་ཆེན་མི་དམངས་སྲིད་གཞུང་དྲ་བ།
མཚོ་སྔོན་གསར་འགྱུར་དྲ་བའི་འཕྲིན། ཟླ11ཚེས27ཉིན་ཞིང་ཆེན་སྲིད་གྲོས་ཀྱི་ཏང་ཙུའུ་ཧྲུའུ་ཅི། ཀྲུའུ་ཞི་མགོན་པོ་བཀྲ་ཤིས་ཀྱིས་མཚོ་སྔོན་དགེ་ཐོན་སློབ་ཆེན་དུ་ཕེབས་ནས་རྒྱལ་ཡོངས་ཀྱི་གཙོ་གནད་ཚོད་ལྟ་ཁང་འཛུགས་སྐྲུན་འཁོར་སྐྱོད་དང་གྲུབ་འབྲས་གཞན་སྒྱུར་སོགས་ཀྱི་ལས་དོན་ལ་རྟོག་ཞིབ་བྱས། ཏང་གི་སྐབས་ཉི་ཤུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་བཞི་པའི་དགོངས་དོན་སློབ་སྦྱོང་དང་ལག་བསྟར་གཏིང་ཟབ་བྱས་ཏེ་འགན་འཁྲི་འཁུར་ཤུགས་ཆེ་རུ་གཏོང་བ་དང་གསར་གཏོད་ལག་ལེན་བྱེད་ཕོད་པ་བྱས་ནས་མཚོ་སྔོན་གྱི་སློབ་གསོའི་སྤུས་ཚད་མཐོ་བའི་འཕེལ་རྒྱས་ལ་མཐོ་རིམ་སློབ་གྲྭའི་བློ་གྲོས་དང་སྟོབས་ཤུགས་འབུལ་དགོས་ཞེས་ནན་གྱིས་བསྟན།
མགོན་པོ་བཀྲ་ཤིས་སོགས་རྒྱལ་ཡོངས་ཀྱི་གཙོ་གནད་ཚོད་ལྟ་ཁང་དུ་ཕེབས་ནས། ཡུལ་དངོས་ནས་གྲངས་གཞི་འཚོལ་བསྡུ་དང་ཐག་གཅོད་ལྟེ་གནས། བརྩི་ཐབས་ཞིབ་འཇུག་གསར་སྤེལ་ཚོད་ལྟ་ཁང་། མཉེན་ཆས་བེད་སྤྱོད་སྟེགས་བུ་སོགས་ལ་གཟིགས་ཞིབ་གནང་། གྲུབ་འབྲས་འགྲེམས་སྟོན་ཚོམས་ཆེན་དུ། རྟོག་ཞིབ་ཚན་ཆུང་གིས་ཚོད་ལྟ་ཁང་གི་འཕེལ་རྒྱས་བརྒྱུད་རིམ་དང་། ཞིབ་འཇུག་ཁ་ཕྱོགས། གྲུབ་འབྲས་གཞན་བསྒྱུར་སོགས་ཀྱི་གནས་ཚུལ་ལ་ཞིབ་ཕྲའི་ངང་རྒྱུས་ལོན་བྱས། པཎྚི་ཏའི་མཉེན་ཆས་རབ་དང་རིམ་པ་ནི་ཚོད་ལྟ་ཁང་གི་ཞིབ་འཇུག་གྲུབ་འབྲས་ཡིན་ལ། དེའི་ཁྲོད་ཡིག་སྒྱུར་དང་། སྐད་བརྡ། ངོས་འཛིན། ཚིག་མཛོད། ཡིག་ཚགས། བོད་ལུགས་གསོ་རིག་བཅས་མཉེན་ཆས6ཚུད་ཡོད། ད་ལོའི་ཟླ4པའི་བར་དུ། མཉེན་ཆས་དེ་དག་བཀོལ་སྤྱོད་བྱེད་མཁན་ཁྲི་སུམ་ཅུ་ལྷག་ལ་ཞབས་ཞུ་འདོན་སྤྲོད་བྱས་ཡོད་ལ། འདྲི་རྟོག་བྱེད་མཁན་ས་ཡ་བཞི་དང་འབུམ་དྲུག་བརྒལ། མགོན་པོ་བཀྲ་ཤིས་ཀྱིས་ལས་བྱེད་མི་སྣའི་ངོ་སྤྲོད་ལ་ཉན་ཞོར་དུ་སློབ་གྲྭའི་འགན་ཁུར་བློ་མཐུན་དང་གཏིང་ཟབ་ངང་གྲོས་བསྡུར་བྱས། དགེ་རྒན་གྱི་དཔུང་སྡེ་ལ་མུ་མཐུད་དུ་ཤུགས་བསྣན་ཏེ་ཚོད་ལྟ་ཁང་འཛུགས་བསྐྲུན་ལེགས་པོ་བྱེད་པར་སྐུལ་འདེད་བཏང་ནས། ཚན་རྩལ་གྱི་གྲུབ་འབྲས་ཀྱིས་མཚོ་སྔོན་གྱི་འཕེལ་རྒྱས་ལ་ཞབས་ཞུ་གང་ལེགས་སྒྲུབ་དགོས་པའི་སྐུལ་མ་གནང་།
དེའི་རྗེས་འཚོགས་པའི་བཞུགས་མོལ་ཚོགས་འདུའི་ཐོག རྟོག་ཞིབ་ཚན་ཆུང་གིས་སློབ་གྲྭའི་སྤྱི་ཡོངས་ཀྱི་བྱ་བའི་གནས་ཚུལ་ངོ་སྤྲོད་ལ་ཉན་པ་དང་། སློབ་གྲྭས་དགེ་ཐོན་སློབ་གསོའི་ལས་སྒོ་གཙོ་བོ་གཏིང་ཟབ་ཏུ་སྤེལ་ནས། མཚོ་སྔོན་གྱི་སློབ་གསོའི་ལས་དོན་འཕེལ་རྒྱས་དང་ཤེས་ལྡན་མི་སྣའི་དཔུང་ཁག་འཛུགས་སྐྱོང་བྱ་ཆེད་བྱས་རྗེས་གལ་ཆེན་བཞག་པར་གདེང་འཇོག་མཐོན་པོ་བྱས། མགོན་པོ་བཀྲ་ཤིས་ཀྱིས་ཚོགས་འདུར་ཞུགས་མཁན་བློ་མཐུན་རྣམས་ལ་ཏང་གི་སྐབས་ཉི་ཤུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་བཞི་པའི་དགོངས་དོན་སློབ་སྦྱོང་བྱས་པའི་མྱོང་ཚོར་མཉམ་སྤྱོད་བྱས། ཁོས་བསྟན་དོན། ཏང་གི་སྐབས་ཉི་ཤུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་བཞི་པ་ནི་བརྒྱ་ལོ་གཉིས་པའི་འབད་འཐབ་དམིགས་འབེན་ཕྱོགས་སུ་དཔུང་སྐྱོད་བྱེད་པའི་སྐྱོད་ལམ་གསར་པའི་སྟེང་བསྡུས་པའི་ཚོགས་འདུ་གལ་ཆེན་ཞིག་རེད། དགེ་ཐོན་སློབ་ཆེན་གྱིས་ཞིང་ཆེན་ཏང་ཨུ་དང་ཞིང་ཆེན་སྲིད་གཞུང་གི་བཀོད་སྒྲིག་བླང་བྱ་དོན་འཁྱོལ་ནན་ཏན་བྱེད་པ་དང་། ཚང་འཛོམས་གྲོས་ཚོགས་ཀྱི་དགོངས་དོན་སློབ་སྦྱོང་དང་དྲིལ་བསྒྲགས་ལག་བསྟར་ཡག་པོ་བྱེད་པ། སློབ་གཉེར་ཁ་ཕྱོགས་ཡང་དག་རྒྱུན་འཁྱོངས་བྱེད་པ། སློབ་གསོ་པའི་སྙིང་སྟོབས་དར་སྤེལ་ཤུགས་ཆེན་གཏོང་བ་བཅས་བྱས་ཏེ། དུས་རབས་གསར་པའི་བྱང་ཚད་མཐོ་བའི་སློབ་གསོ་ཤེས་ལྡན་མི་སྣའི་དཔུང་ཁག་གསོ་སྐྱོང་བྱས་ནས། མཚོ་སྔོན་གྱི་སློབ་གསོའི་སྤུས་ཚད་མཐོ་བའི་འཕེལ་རྒྱས་ལ་འདེགས་སྐྱོར་གལ་ཆེན་འདོན་སྤྲོད་བྱ་དགོས།
མགོན་པོ་བཀྲ་ཤིས་ཀྱིས་བསྟན་དོན། ལོ་མང་པོའི་རིང་ལ། མཚོ་སྔོན་དགེ་ཐོན་སློབ་ཆེན་གྱིས་ཐོག་མཐའ་བར་གསུམ་དུ་སློབ་མའི་ཀུན་སྤྱོད་ཀྱི་སློབ་གསོར་ཚད་མཐོའི་མཐོང་ཆེན་བྱས་ཏེ། ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་ཇེ་ཟབ་ཏུ་གཏོང་བའི་གཙོ་གནད་ཁོང་དུ་ཆུད་པ་དང་། རང་ངོས་འཕེལ་རྒྱས་གཏོང་རྒྱུ་དེ་ཞིང་ཆེན་ཡོངས་ཀྱི་བྱ་བའི་སྤྱི་ཡོངས་དང་མཉམ་འདྲེས་བྱ་རྒྱུ་རྒྱུན་འཁྱོངས་བྱེད་པ་དང་། ཁྱད་ལྡན་རིག་ཚན་དང་ཆེད་ལས་གསོ་སྐྱོང་འཕེལ་རྒྱས་གཏོང་བ། ཞིང་ཆེན་ཡོངས་ཀྱི་མི་རིགས་མཐུན་སྒྲིལ་ཡར་ཐོན་བྱ་གཞག་ལ་ཞབས་འདེགས་ནུས་ལྡན་ཞུ་བ་བཅས་བྱས་ཏེ། དེང་རབས་ཅན་གྱི་མཚོ་སྔོན་གསར་པའི་འཛུགས་སྐྲུན་ལ་སྐྱེ་སྟོབས་དང་གསོན་ཤུགས་བསྣན་ཡོད། མུ་མཐུད་དུ་རྩ་ཆེའི་ཉམས་མྱོང་དང་སློབ་གཉེར་གྱི་དགེ་མཚན་སྲ་བརྟན་དང་འཕེལ་རྒྱས་ཡག་པོ་གཏོང་བ་དང་། ཏང་གིས་མི་གསོ་སྐྱོང་དང་རྒྱལ་ཁབ་ཀྱི་ཆེད་དུ་ཤེས་ལྡན་མི་སྣ་གསོ་སྐྱོང་བྱེད་པའི་ཐོག་མའི་བསམ་འདུན་དང་འགན་འཁྲི་བརྟན་སྲུང་། འགན་འཁྲི་དང་ལས་རིགས་གཙོ་བོར་དམིགས་ནས། རིག་གཞུང་ཚན་ཁག་འཛུགས་སྐྲུན་དང་ཚན་རིག་ཞིབ་འཇུག་གསར་གཏོད་བྱེད་ཤུགས་ཆེ་རུ་གཏོང་བ། སློབ་གཉེར་མི་སྣ་གསོ་སྐྱོང་བྱེད་པའི་ཆུ་ཚད་རྒྱུན་ཆད་མེད་པར་ཇེ་མཐོར་གཏོང་བ་བཅས་ལ་རེ་བ་བཅངས་ཡོད། ཞིང་ཆེན་སྲིད་གྲོས་ཀྱིས་སྔར་བཞིན་སློབ་གྲྭའི་འཛུགས་སྐྲུན་དང་འཕེལ་རྒྱས་གཏོང་བར་སེམས་ཁུར་དང་རྒྱབ་སྐྱོར་བྱེད་པ་དང་། འབྲེལ་གཏུག་བྱེད་གནས་ཧུར་ཐག་སྒོས་འཛུགས་པ། རང་འགུལ་ངང་ཐབས་འདོན་ཇུས་འབུལ་བཅས་བྱས་ཏེ་སློབ་གྲྭ་སྔར་ལས་བཟང་བོར་བསྒྲུབ་པ་དང་། སྔར་ལས་ཁྱད་ཆོས་ལྡན་པ་ཞིག་འཛུགས་སྐྲུན་བྱེད་དགོས།
ཁོང་ཡུང་དང་ཝང་ཞོན་ཚོགས་འདུར་ཞུགས།
