ཀན་སུའུ་ཡིས་དེང་རབས་ཞིང་ལས་ཀྱི་སྤུས་ཚད་དང་ཕན་འབྲས་ཇེ་ལེགས་སུ་འགྲོ་བར་སྐུལ་འདེད་བཏང་།

ཏང་གི་སྐབས་ཉི་ཤུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་བཞི་པའི་སྟེང་། ཞིང་ལས་དང་གྲོང་གསེབ་དེང་རབས་ཅན་དུ་འགྱུར་ཚད་ཇེ་མགྱོགས་སུ་གཏོང་བ་དང་། གྲོང་གསེབ་ཕྱོགས་ཡོངས་ནས་དར་རྒྱས་གཏོང་བར་སྐུལ་འདེད་ཏན་ཏིག་གཏོང་དགོས་ཞེས་བཏོན་ཡོད། ཀན་སུའུ་ཡིས་ཚང་འཛོམས་གྲོས་ཚོགས་ཀྱི་དགོངས་དོན་སློབ་སྦྱོང་དང་ལག་བསྟར་ནན་ཏན་བྱས་ནས། ཞིང་ལས་ཕྱོགས་བསྡུས་ཐོན་སྐྱེད་བྱེད་ནུས་དང་སྤུས་ལེགས་ཕན་འབྲས་རྒྱུན་མཐུད་ངང་ཆེ་རུ་བཏང་སྟེ། ཞིང་ལས་སྟོབས་ལྡན་རྒྱལ་ཁབ་འཛུགས་སྐྲུན་གང་མགྱོགས་བྱེད་པར་སྟོབས་ཤུགས་ཕུལ་ཡོད།

ཀན་སུའུ་ཡི་དབུས་རྒྱུད་དང་ཤར་རྒྱུད་ཀྱི་རི་ཁུལ་དུ། དཀར་པོ་ཆིག་ཐུབ་དང་སྲད་དཀར་སོགས་སྨན་སྣ་སྔོག་འདོན་བྱེད་བཞིན་པའི་སྒང་རེད། ད་ལོར། ཀྲུང་ལུགས་སྨན་སྣའི་བརྔ་བསྡུ་འཕྲུལ་འཁོར་གསར་པ་ཁག་གཅིག་སྤྱོད་འགོ་ཚུགས་པ་དང་བསྟུན་ནས། ས་གནས་དེ་གར་སྨན་སྣ་མུའུ་གཅིག་འཐུ་བའི་དུས་ཚོད་ཆུ་ཚོད1ཡས་མས་ཇེ་ཐུང་དུ་སོང་པ་དང་ལས་ཆོད་ཆེ་རུ་ཕྱིན་ཡོད། ཀན་སུའུ་རི་ཁུལ་གྱི་རྒྱ་ཁྱོན་གྱིས་ཞིང་ཆེན་ཡོངས་ཀྱི་རྨོ་ཞིང་རྒྱ་ཁྱོན་གྱི76%ཟིན་པ་དང་། ཁྱད་ལྡན་ཐོན་ལས60%ལས་བརྒལ་བ་རི་ཁུལ་དུ་ཁྱབ་ཡོད། ལོ་ལྔའི་འཆར་འགོད་བཅུ་བཞི་པའི་རིང་ལ། ཀན་སུའུ་ཡིས་རིམ་རྩིས་བྱས་ན་ཞིང་འཕྲུལ་གསར་གཏོད་ཞིབ་འཇུག་གི་མ་དངུལ་སྒོར་དུང་ཕྱུར་གསུམ་དང་བྱེ་བ་དྲུག་ས་ཡ་བདུན་བཏང་པ་དང་། ཞིང་འཕྲུལ་ཐོན་སྐྱེད་ཁེ་ལས་དང་ཞིང་ལས་སློབ་གླིང་མང་པོར་མཉམ་ལས་བྱས་ནས། ཞིང་ལས་འཕྲུལ་ཆས་ཀྱི་ཐོན་རྫས་གསར་པ་བརྒྱ་ལྷག་ཞིབ་འཇུག་བཟོ་སྐྲུན་བྱས་པ་དང་། རི་ཁུལ་གྱི་ཞིང་ལས་འཕྲུལ་ཆས་ཅན་དུ་འགྱུར་ཚད67%ལ་སླེབས་སུ་བཅུག་ཡོད།

ཀན་སུའུ་ཞིང་ལས་སློབ་ཆེན་འཕྲུལ་གློག་བཟོ་སྐྲུན་སློབ་གླིང་གི་ཡོན་ཀྲང་སུན་ཝའེ་ཡིས་བཤད་རྒྱུར། ཏང་གི་སྐབས་ཉི་ཤུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་བཞི་པའི་དགོངས་དོན་གྱིས་ཞིང་ལས་དེང་རབས་ཅན་དུ་འགྱུར་བར་ཁ་ཕྱོགས་སྔར་ལས་གསལ་པོར་བསྟན་ཡོད། ང་ཚོས་ལག་རྩལ་གྱི་འགག་གནད་སེལ་ནས་ཞིབ་འཇུག་དང་ཐོན་སྐྱེད། སྐུལ་འདེད། བཀོལ་སྤྱོད་བཅས་ཚང་མ་མཐུན་སྦྱོར་ཡོང་བ་བྱ་རྒྱུ་ཡིན་ལ། གོ་སྐབས་བཟང་པོ་དང་ས་ཞིང་ལེགས་པོ། ས་བོན་བཟང་པོ། བྱེད་ཐབས་ལེགས་པོ་བཅས་ཟུང་འབྲེལ་དམ་ཟབ་བྱ་རྒྱུ་ཡིན་ཟེར།

“ལོ་ལྔའི་འཆར་འགོད་བཅུ་བཞི་པའི”རིང་ལ། ཀན་སུའུ་ཡིས་ཞིང་ལས་ཚན་རྩལ་ལ་མ་དངུལ་གཏོང་ཤུགས་རྒྱུན་མི་ཆད་པར་ཆེ་རུ་བཏང་ནས། ཞིང་ལས་ཚན་རྩལ་ཡར་ཐོན་ལ་ཕན་ནུས་ཐོན་ཚད2020ལོའི57%ནས 2024ལོའི60%ལ་འཕར། ཚང་འཛོམས་གྲོས་ཚོགས་ཀྱི་དགོངས་དོན་ལག་བསྟར་དོན་འཁྱོལ་བྱས་ནས། གོ་རིམ་རྗེས་མར་ཀན་སུའུ་ཡིས་ཧུར་ཐག་སྒོས་དེང་རབས་ཀྱི་གྲང་ཐན་ཁྱད་ལྡན་ཞིང་ལས་འཕེལ་རྒྱས་སུ་བཏང་སྟེ། འགྲན་རྩོད་ཀྱི་ནུས་པ་ལྡན་པའི་ཞིང་ལས་སྤུས་རྟགས་ཁག་ཅིག་སྐྱོང་རྒྱུ་རེད།

ཀན་སུའུ་ཞིང་ཆེན་ཞིང་ལས་ཞིང་སྡེ་ཐིན་གྱི་ཐིན་ཀྲང་གཞོན་པ་ཁྲིན་ཅང་ཧྥུན་གྱིས་བཤད་རྒྱུར། “ལོ་ལྔའི་འཆར་འགོད་བཅོ་ལྔ་པར”རྒྱང་ལྟ་བྱས་ན། ང་ཚོས“གཏན་ཕབ་གཉིས”ཀྱི་ཐག་གཅོད་རང་བཞིན་གྱི་དོན་སྙིང་ལ་གོ་བ་གཏིང་ཟབ་ལེན་དགོས་པ་དང་། “སྲུང་སྐྱོང་གཉིས”མཐའ་གཅིག་ཏུ་སྒྲུབ་ཐུབ་པ་བྱེད་དགོས། ཚན་རྩལ་ཞིང་ལས་དང་ལྗང་མདོག་ཞིང་ལས། སྤུས་ལེགས་ཞིང་ལས། སྤུས་རྟགས་ཞིང་ལས་བཅས་གཅིག་གྱུར་འཆར་འགོད་ཀྱིས་འཕེལ་རྒྱས་བཏང་ནས། ཞིང་ལས་ཀྱི་ཕྱོགས་བསྡུས་ཐོན་སྐྱེད་ནུས་པ་དང་སྤུས་ལེགས་ཕན་འབྲས་རྒྱུན་ཆད་མེད་པར་ཆེ་རུ་གཏོང་དགོས།