ཞིང་ཆེན་སྲིད་གཞུང་གིས་ཏང་ཙུའུ་དང་རྒྱུན་ལས་གྲོས་ཚོགས་བསྡུས་པ།

ཟླ11པའི་ཚེས26ཉིན།  ཞིང་ཆེན་སྲིད་གཞུང་གི་ཏང་ཙུའུ་ཧྲུའུ་ཅི། ཧྲིན་ཀྲང་ལའོ་ཏུང་ཁྲོན་གྱིས་མགོ་འཛིན་བྱས་ཏེ་ཞིང་ཆེན་སྲིད་གཞུང་གི་ཏང་ཙུའུ་གྲོས་ཚོགས་དང་རྒྱུན་ལས་གྲོས་ཚོགས་བསྡུས། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཉེ་ལམ་གནང་བའི་གསུང་བཤད་གལ་ཆེན་གྱི་དགོངས་དོན་བརྒྱུད་སྒྲོག་དང་། ཞིང་ཆེན་ཏང་ཨུའི་བླང་བྱ་དོན་འཁྱོལ་བྱས།  ལྗང་མདོག་སྐྱེ་ལྡན་རྫས་ཀྱི་ཞིང་ཕྱུགས་ཐོན་རྫས་ཕྱིར་འདྲེན་བྱེད་ས་བསྐྲུན་པ་དང་།  མཐོ་སྒང་གསོ་རིག་ཞིབ་འཇུག་ལྟེ་གནས་འཛུགས་བསྐྲུན།  རིག་དངོས་ཚན་རྩལ་གསར་གཏོད།  ཆུའི་འབག་བཙོག་ལ་བཅོས་སྐྱོང།  རོང་འབྲོག་ས་ཁུལ་གྱི་ཆུའི་མཁོ་འདོན་འགན་སྲུང་།  གངས་ཤུད་ལུས་རྩལ་གྱི་འཕེལ་རྒྱས་སོགས་ཀྱི་བྱ་བར་ཞིབ་འཇུག་དང་བཀོད་སྒྲིག་བྱས།

ཞིང་ཆེན་སྲིད་གཞུང་གི་ཏང་ཙུའུ་གྲོས་ཚོགས་ལས་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་བློ་མཐུན་ཧུའུ་ཡའོ་པང་སྐུ་འཁྲུངས་ནས་ལོ་འཁོར110འཁོར་བའི་བཞུགས་མོལ་གྲོས་ཚོགས་སྟེང་གནང་བའི་གསུང་བཤད་གལ་ཆེན་གྱི་དགོངས་དོན་བརྒྱུད་སྒྲོག་བྱས་པ་དང་།  བློ་མཐུན་ཧུའུ་ཡའོ་པང་གི་བླ་ན་མེད་པའི་བསམ་བློ་དང་ཕུལ་བྱུང་གི་སྤྱོད་ལམ་ལ་སློབ་སྦྱོང་ཏན་ཏིག་བྱེད་པ་དང་།  ཕུགས་བསམ་དང་དད་མོས་སྲ་བརྟན་དུ་གཏོང་བ།  ཆབ་སྲིད་ལ་བློ་སེམས་དཀར་བ།  ཐོག་མཐའ་བར་གསུམ་དུ་ཏང་གི་ཆབ་སྲིད་འཛུགས་བསྐྲུན་ཨང་དང་པོར་འཇོག་པ། ཆད་ལྷག་མེད་པར་ཏང་ཀྲུང་དབྱང་དང་རྒྱལ་སྲིད་སྤྱི་ཁྱབ་ཁང་གི་བཀོད་སྒྲིག་དང་ཞིང་ཆེན་ཏང་ཨུའི་བླང་བྱ་དོན་འཁྱོལ་བྱེད་པ། དངོས་ཐོག་བདེན་འཚོལ་གྱི་བྱ་བའི་བྱེད་ཐབས་དེ་སྲིད་གཞུང་གི་བྱ་བའི་གོ་རིམ་ཧྲིལ་བོའི་ཕྱོགས་སོ་སོར་ཁྱབ་པར་བྱེད་པ།  སྐྱེ་ཁམས་དཔལ་ཡོན་གྱི་མཐོ་ས་བསྐྲུན་པ་དང་། ཐོན་ལས་ཀྱི“གནས་བཞི”འཛུགས་བསྐྲུན་སོགས་ཀྱི་ལྟེ་བའི་ལས་འགན་ལ་དམ་པོར་དམིགས་པ་དང་།  ཕྱོགས་ཡོངས་ནས་གཏིང་ཟབ་བཅོས་བསྒྱུར་ལ་སྐུལ་འདེད་བྱེད་པ།  སེམས་ཤུགས་དང་ནུས་ཤུགས་ལ་བརྟེན་ནས་མང་ཚོགས་ཀྱི་བྲེལ་དཀའ་ཁྲེལ་སྒུག་གི་གནད་དོན་ཐག་གཅོད་བྱེད་པ།  སྤྱོད་གཙང་གཞུང་དྲང་དར་སྤེལ་བྱེད་པ།  བློ་དཀར་གྱི་ཕུགས་མདུན་དང་དྲིན་གཟོའི་བསམ་བློ།  འགན་ཁུར་གྱི་འདུ་ཤེས་བཅས་ལ་བརྟེན་ནས་ཀྲུང་གོའི་ལུགས་ཀྱི་དེང་རབས་ཅན་གྱི་མཚོ་སྔོན་གྱི་ལེའུ་གསར་བ་འབད་པས་འབྲི་དགོས་ཞེས་བསྟན།

ཞིང་ཆེན་སྲིད་གཞུང་གི་རྒྱུན་ལས་གྲོས་ཚོགས་ཀྱིས་བསྟན་དོན། ཞིང་ཆེན་དང་པུའུ་ཡི་མཉམ་སྒྲུབ་སྤྱི་སྟེགས་ཀྱི་བྱེད་ནུས་འདོན་སྤེལ་གང་ལེགས་བྱས་ཏེ།  སྐྱེ་ཁམས་ཁོར་ཡུག་གི་ཐེག་ནུས་དང་ཞིང་ཕྱུགས་ཐོན་རྫས་འདོན་སྤྲོད་ཀྱི་འགན་སྲུང་ནུས་པར་གཅིག་གྱུར་བཀོད་འདོམས་བྱས་ནས།  རྒྱུན་མཐུད་ངང་ཐོན་ཁུངས་ཀྱི་སྦྲེལ་ཕྲེང་ལེགས་བསྒྱུར་དང་།  ཐོན་རྫས་ཀྱི་སྦྲེལ་ཕྲེང་རྒྱུན་བསྲངས།  ཕྱིར་འཚོང་གི་སྦྲེལ་ཕྲེང་རྒྱ་བསྐྱེད་བཅས་ལེགས་བསྒྱུར་བྱས་ཏེ། མགྱོགས་མྱར་ངང་ཞིང་ལས་ཀྱི་སྤུས་གསར་ཐོན་སྐྱེད་ནུས་པར་འཕེལ་རྒྱས་གཏོང་བ།  རྒྱུན་མཐུད་ངང“དག་གཙང་གི་མཚོ་སྔོན། མཐོ་སྒང་གི་ཐོན་རྫས”ཞེས་པའི་ཁྲོམ་རའི་བཟུང་ཚད་དང་སྤུས་རྟགས་ཀྱི་སྐད་གྲགས་ཆོད་ཚད་མུ་མཐུད་དུ་ཇེ་མཐོར་བཏང་སྟེ། ཕྱིར་འཚོང་བྱེད་ས་འཛུགས་སྐྲུན་བྱེད་པའི་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་བཏང་།

གྲོས་ཚོགས་ཀྱིས་བསྟན་དོན།  ཚན་རིག་དང་མཐུན་པའི་སྒོ་ནས“ལོ་ལྔའི་འཆར་འགོད་བཅོ་ལྔ་བའི”མཐོ་སྒང་གི་གསོ་རིག་ཞིབ་འཇུག་གི་ནང་དོན་གཙོ་བོ་དང་གཙོ་གནད་ཁ་ཕྱོགས་ཇུས་འགོད་བྱ་དགོས་པ་དང་། འཇོན་མི་གཅིག་བསྡུས་དང་གྲུབ་འབྲས་བསྒྱུར་བཀོད། ལམ་ལུགས་གསར་གཏོད་བཅས་ཀྱི་སྟེང་རྒྱུན་མཐུད་ངང་ནུས་ཤུགས་བཏོན་ནས། མཐོ་སྒང་གི་གསོ་རིག་ཞིབ་འཇུག་ལྟེ་གནས་འཛུགས་བསྐྲུན་དང་ཚན་རིག་ཞིབ་འཇུག་བྱ་བ་སྐས་རིམ་གསར་པ་ཞིག་ཏུ་སླེབས་པར་སྐུལ་འདེད་བཏང་སྟེ།  རྒྱུན་མཐུད་ངང་མཐོ་སྒང་མང་ཚོགས་ཀྱི་བདེ་ཐང་དང་བདེ་སྐྱིད་ཇེ་ཆེར་གཏོང་དགོས།

གྲོས་ཚོགས་ཀྱིས་བསྟན་དོན།  རང་ཞིང་གི་རིག་དངོས་ཐོན་ཁུངས་ཀྱི་ཁྱད་ཆོས་དང་ཚན་རྩལ་གསར་གཏོད་ཀྱི་རྨང་གཞི་ཟུང་འབྲེལ་བྱེད་པ་དང་།  ཐོན་ཁུངས་ཀྱི་བཀོད་གཏོང་ལེགས་བསྒྱུར་དང་རྒྱ་རྐྱེན་གཅིག་བསྡུས་ལ་སྐུལ་འདེད་བྱེད་པ།  ཚན་རིག་ཞིབ་འཇུག་གི་སྤྱི་སྟེགས་འཛུགས་པ་དང་ཚན་རྩལ་གྲུབ་འབྲས་གཞན་བསྒྱུར་ལ་ཤུགས་བསྣན་ནས། ནུས་ཤུགས་ཡོད་རྒུས་མཚོ་སྔོན་གྱི་ཁྱད་ཆོས་ལྡན་པའི་རིག་དངོས་ཚན་རྩལ་གྱི་མ་ལག་གསར་པ་བསྐྲུན་དགོས།

གྲོས་ཚོགས་ཀྱིས་བསྟན་དོན།  འབག་བཙོག་ཇེ་ཆུང་དུ་གཏོང་བ་དང་ཤོང་ཚད་ཇེ་ཆེར་གཏོང་བའི་མཐུན་སྦྱོར་ནུས་ཤུགས་རྒྱུན་འཁྱོངས་བྱས་ཏེ།  ཕྱོགས་ཡོངས་ནས་བདེ་སྐྱིད་མཚེའུ་འཛུགས་བསྐྲུན་བྱེད་པ་སྲོག་ཤིང་བྱས་ཏེ། ཆུའི་གནོད་སྐྱོན་དང་ཆུའི་ཐོན་ཁུངས།  ཆུའི་སྐྱེ་ཁམས།  ཆུའི་ཁོར་ཡུག  ཆུའི་རིག་གནས་དང་མཚོ་འགྲམ་གྱི་སྲུང་སྐྱོབ་བཅས་གཅིག་གྱུར་བཀོད་འདོམས་བྱེད་པ།  དངུལ་གཏོང་དང་འཛུགས་སྐྲུན་དམ་འཛིན་བྱས་ཏེ་སྤུས་ཚད་མཐོ་བའི་ཆུའི་སྐྱེ་ཁམས་ཁོར་ཡུག་གིས་དཔལ་འབྱོར་སྤྱི་ཚོགས་ཀྱི་སྤུས་ཚད་མཐོ་བའི་འཕེལ་རྒྱས་ལ་འདེགས་སྐྱོར་བྱ་དགོས།

གྲོས་ཚོགས་གྲོས་ཞིབ་བྱས་ཏེ《མཚོ་སྔོན་ཞིང་ཆེན་རོང་འབྲོག་ས་ཁུལ་གྱི་ཆུའི་འདོན་སྤྲོད་ཀྱི་འགན་སྲུང་མཐོར་འདེགས་གཏོང་བའི་འགག་སྒྲོལ་འགུལ་སྤྱོད་ཇུས་གཞི》《མཚོ་སྔོན་ཞིང་ཆེན་གངས་ཤུད་ལུས་རྩལ་གྱི་སྤུས་ཚད་མཐོ་བའི་འཕེལ་རྒྱས་ཀྱིས་གངས་ཤུད་དཔལ་འབྱོར་གྱི་གསོན་ཤུགས་ཆེར་བསྐྱེད་བྱེད་པའི་ཇུས་གཞི》《མཚོ་སྔོན་ཞིང་ཆེན་དབང་བོ་སྐྱོན་ཅན་གྱི་ལོ་གསུམ་ལས་ཞུགས་འགུལ་སྤྱོད་ཀྱི་ལག་བསྟར་ཇུས་གཞི(2025-2027)》《མཚོ་སྔོན་ཞིང་ཆེན་གྱོད་འབྲེལ་རྒྱུ་ནོར་གྱི་རིན་གོང་གཏན་འབེབས་བྱེད་ཐབས(བཟོ་བཅོས་འཆར་ཟིན)》《མཚོ་སྔོན་ཞིང་ཆེན་གྱི་གློག་རྫས་ནུས་གསོག་གློག་ཁང་གི་མེ་ཟོན་བདེ་འཇགས་དོ་དམ་བྱེད་ཐབས(བཟོ་བཅོས་འཆར་ཟིན)》བཅས་ལ་སྤྱི་ཆ་ནས་གྲོས་འཆམ་བྱུང་།

གྲོས་ཚོགས་སྟེང་ད་དུང་དོན་ཚན་གཞན་དག་ལ་ཞིབ་འཇུག་བྱས།