མཚོ་སྔོན་ཞིང་ཆེན་མི་དམངས་སྲིད་གཞུང་དྲ་བ།
ཟླ9པའི་ཚེས30ཉིན་གྱི་སྔ་དྲོར། རང་ཞིང་གིས་ཟི་ལིང་གྲོང་ཁྱེར་སྔོན་གཤེགས་དཔའ་བོའི་བང་སོ་རུ2024ལོའི“སྔོན་གཤེགས་དཔའ་བོར་དྲན་གསོ”ཞུ་བའི་བྱ་འགུལ་སྤེལ། ཞིང་ཆེན་ཏང་ཨུའི་ཧྲུའུ་ཅི། ཞིང་ཆེན་དམངས་འཐུས་ཚོགས་ཆེན་རྒྱུན་ལས་ཨུ་ཡོན་ལྷན་ཁང་གི་ཀྲུའུ་རིན་ཁྲིན་ཀང་དང་། ཞིང་ཆེན་སྲིད་གྲོས་ཀྱི་ཀྲུའུ་ཞི་མགོན་པོ་བཀྲ་ཤིས། ཞིང་ཆེན་ཏང་ཨུའི་ཧྲུའུ་ཅི་གཞོན་པ་ལིའུ་ཆི་ཧྥན་བཅས་བྱ་འགུལ་ལ་ཞུགས་ནས། ཞིང་ཆེན་ཡོངས་ཀྱི་ལས་རིགས་སོ་སོའི་འཐུས་མི་དང་མཉམ་དུ་གསར་བརྗེའི་སྔོན་གཤེགས་དཔའ་བོར་དྲན་གསོ་ཞུས་པ་དང་། སྔོན་གཤེགས་དཔའ་བོའི་སྙིང་སྟོབས་རྒྱུན་འཛིན་བྱས་ནས། བློ་བརྟན་འགྱུར་མེད་སྒོས་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་མཛུབ་ཁྲིད་གནང་བའི་ཕྱོགས་སུ་མདུན་སྐྱོད་བྱས་ཏེ། སེམས་ཤུགས་གཅིག་སྒྲིལ་གྱིས་ཏང་བློ་བདེ་བ་དང་མི་དམངས་ཀྱི་རེ་བ་སྟོང་ཟད་དུ་མི་གཏོང་བའི“མཚོ་སྔོན་གྱི་རྒྱུགས་ལན”ཡག་པོ་སྤྲད།
ལྷོ་རིའི་འདབས་སུ་ཚང་ཚིང་གཡུ་ལོ་ཐགས་སུ་བཀྲ་ཞིང་། དམར་དམག་ནུབ་ལམ་དམག་དཔུང་གི་སྔོན་གཤེགས་དཔའ་བོ་ལྔ་བརྒྱ་དང་བཅུ་བདུན་རྔམ་བརྗིད་དང་གཟི་ཉམས་ཀྱི་ཀློང་ན་བཞུགས་འདུག དུས་ཚོད་དགུའི་སྟེང་དུ། གསར་བརྗེའི་སྔོན་གཤེགས་དཔའ་བོའི་དྲན་གསོའི་རྡོ་རིང་ལ་མེ་ཏོག་སི་ར་འབུལ་བའི་མཛད་སྒོ་འགོ་བརྩམས་ཤིང་། ཚང་མས་གྲལ་དག་པའི་རུ་བསྒྲིགས་ནས་ཡུལ་དངོས་སུ《བློས་བླངས་དམག་གི་མདུན་སྐྱོད་གླུ་གཞས》བླངས། རྒྱལ་གླུ་བླངས་ཚར་རྗེས་ཚོགས་ར་ཡོངས་ཀྱིས་ཞྭ་མོ་ཕུད་དེ་སྔོན་གཤེགས་དཔའ་བོར་མྱ་ངན་ཞུས། མྱ་ངན་མཇུག་བསྒྲིལ་རྗེས་ལོ་ཆུང་གདོང་ལེན་རུ་ཁག་གི་རུ་མིས《ང་ཚོ་ནི་གུང་ཁྲན་རིང་ལུགས་ཀྱི་རྒྱུན་འཛིན་པ་ཡིན》ཞེས་པའི་གླུ་གཞས་བླངས། དེའི་རྗེས་སུ་བ《མེ་ཏོག་སི་ར་འབུལ་བའི་རོལ་དབྱངས》དང་བསྟུན་ནས་གུས་དམག18ཀྱིས་མེ་ཏོག་སི་ར་བཏེགས་ནས་དྲན་གསོའི་རྡོ་རིང་གི་སྟེགས་བུའི་མདུན་དུ་གྲལ་འགྲིག་པོས་བཞག
ཁྲིན་ཀང་གོམ་སྟབས་དལ་མོའི་ངང་མདུན་དུ་བསྐྱོད་དེ་མེ་ཏོག་སི་རའི་གོས་ཐག་ལེགས་སྒྲིག་ཞིབ་ཚགས་བྱས་ནས་དྲན་གསོའི་རྡོ་རིང་ལ་སྐོར་བ་བརྒྱབ་ནས་མཇལ་བ་དང་། ཟི་ལིང་དུ་ཡོད་པའི་ཞིང་ཆེན་རིམ་པ་གཞོན་པ་ཡན་གྱི་འགོ་ཁྲིད་དང་། ཞིང་ཆེན་དམག་ཁུལ་གྱི་དམག་སྤྱི་གཞོན་པ། དྲག་ཆས་ཉེན་རྟོག་མཚོ་སྔོན་སྤྱི་ཁྱབ་རུ་ཁག་གི་ཆབ་སྲིད་ཨུ་ཡོན། ཞིང་ཆེན་ལྟེ་གནས་ཀྱི་མི་དམངས་ཚོགས་པའི་འགན་འཁུར་བ། ཟི་ལིང་གྲོང་ཁྱེར་གྱི་ཐིན་རིམ་པ་གཞོན་པ་ཡན་གྱི་འགོ་ཁྲིད། འཐབ་མོ་པ་རྒན་པ་དང་བློ་མཐུན་རྒན་པ། སྔོན་གཤེགས་དཔའ་བོའི་ཁྱིམ་མི། ལོ་ཆུང་གདོང་ལེན་རུ་ཁག་གི་རུ་མི། བཅིངས་འགྲོལ་དམག་དང་དྲག་ཆས་ཉེན་རྟོག་རུ་ཁག་གི་དཔོན་དམག ལས་བྱེད་མང་ཚོགས་ཀྱི་འཐུས་མི་སོགས་མི400ལྷག་གིས་རིམ་པ་བཞིན་རྡོ་རིང་ལ་སྐོར་བ་བརྒྱབ་ནས་མཇལ་ཏེ་གསར་བརྗེའི་སྔོན་གཤེགས་དཔའ་བོར་བླ་ན་མེད་པའི་གུས་འདུད་ཞུས།
ཞིང་ཆེན་ཏང་ཨུའི་རྒྱུན་ལས་ཨུ་ཡོན། ཟི་ལིང་གྲོང་ཁྱེར་གྱི་ཏང་ཨུའི་ཧྲུའུ་ཅི་ཝང་ཝེ་ཏུང་གིས་མེ་ཏོག་སི་ར་འབུལ་བའི་མཛད་སྒོར་འགོ་འཛིན་བྱས།
མཛད་སྒོ་མཇུག་བསྒྲིལ་རྗེས་འབྲེལ་ཡོད་འགོ་ཁྲིད་ཀྱིས“ཀྲུང་གོ་གསར་པ་འདི་ནས་ཡོང་བ་ཡིན”ཞེས་པའི་བརྗོད་དོན་གཙོ་བོའི་འགྲེམས་སྟོན་ལ་བལྟས་པ་དང་། ང་ཚོའི་ཏང་གིས་ཞི་པའེ་ཕའོ་དུས་སྐབས་ཀྱི་རླབས་ཆེན་གསར་བརྗེའི་ལག་ལེན་དང་ལོ་རྒྱུས་ཀྱི་བྱས་རྗེས་བསྐྱར་དྲན་བྱས་པ་དང་། ཞི་པའེ་ཕའོ་ཡི་སྙིང་སྟོབས་ཀྱི་ཕུན་སུམ་ཚོགས་པའི་ནང་དོན་ལ་སློབ་སྦྱོང་བྱས་ལ། འབད་བརྩོན་ཆེན་པོས་དུས་རབས་གསར་པའི“རྒྱུགས་སྤྲོད”ལམ་བུའི་སྟེང་བསྐྱོད་པའི་བརྩོན་སེམས་ཇེ་དྲག་ཏུ་སོང་།
མཛད་སྒོར་ཞུགས་མཁན་གྱི་ཞིང་ཆེན་ཡོངས་ཀྱི་ལས་རིགས་སོ་སོའི་འཐུས་མིས་བསྟན་དོན། གསར་བརྗེའི་སྔོན་གཤེགས་དཔའ་བོས་མེས་རྒྱལ་དང་མི་རིགས་ཀྱི་ཆེད་དུ་བྱས་རྗེས་རླབས་ཆེན་བཞག་པ་དེ་དག་ལོ་རྒྱུས་ཀྱི་དེབ་ཐེར་དུ་བཀོད་ཡོད་ལ། ང་ཚོས་གསར་བརྗེའི་སྔོན་གཤེགས་དཔའ་བོའི་ཕུགས་འདུན་རྒྱུན་འཛིན་བྱས་ཏེ། ལོ་རྒྱུས་ཀྱི་ལས་འགན་ཕྲག་ཏུ་བླངས་ནས་ནུས་ཤུགས་ཡོད་རྒུས་ཀྲུང་གོའི་ལུགས་ཀྱི་དེང་རབས་ཅན་གྱི་མཚོ་སྔོན་གྱི་ལེའུ་རྩོམ་རྒྱུར་བྱས་རྗེས་འཇོག་དགོས་པ་དང་། ཧུར་ཐག་གིས་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཇུས་འགོད་གནང་བའི་བརྗིད་ཆེའི་འཆར་གཞི་དེ་མཛེས་སྡུག་ལྡན་པའི་དོན་དངོས་སུ་འགྱུར་བར་བྱེད་དགོས་ཟེར།
ཉིན་དེར། ཞིང་ཆེན་ཡོངས་ཀྱི་ས་གནས་སོ་སོ་དང་སྡེ་ཁག་སོ་སོས་རྣམ་པ་མི་འདྲ་བའི་སྒོ་ནས་སྔོན་གཤེགས་དཔའ་བོར་རྗེས་དྲན་ཞུ་བའི་བྱ་འགུལ་སྤེལ།
