རིམས་ནད་ལ་སྙིང་རྗེ་མེད་ཀྱང་།། མི་ཡུལ་དུ་བྱམས་བརྩེས་ཁེངས།།

2020ལོའི་ལོ་སར་ནི་སྔོན་ལོ་དང་མི་འདྲ་བར་གློ་བུར་དུ་བྱུང་བའི་གསར་བྱུང་ཏོག་དབྱིབས་ནད་དུག་གི་གློ་ཚད་འགོས་པའི་རིམས་ནད་ཀྱིས་རྒྱལ་ཡོངས་མི་དམངས་ཀྱི་སེམས་ལ་ཤུགས་རྐྱེན་ཐེབས་པར་མ་ཟད། མཚོ་བྱང་གི་མི་རིགས་ཁག་གི་བུ་ཕྲུག་གི་སེམས་ལའང་ཤུགས་རྐྱེན་ཆེན་པོ་ཐེབས་ཡོད་པ་རེད། ཕྱོགས་གཅིག་དཀའ་ངལ་ལ་འཕྲད་སྐབས་ཕྱོགས་བཞི་མཚམས་བརྒྱད་ནས་རོགས་སྐྱོར་བྱེད་དགོས། ཐེངས་འདིའི་གནད་འགག་གི་དུས་ཚོད་དང་མཉམ་དུ་འབད་འབུངས་བྱེད་པའི་གཡུལ་འཐབ་ནང་དུ་ལས་གནས་བརྟན་སྲུང་བྱེད་པའི་འཐབ་ས་དང་བོའི་སྨན་བཅོས་ལས་དོན་པ་དང་། སྤྱི་བདེའི་མི་དམངས་ཉེན་རྟོག་པ། གཞི་རིམ་ལས་བྱེད་པ་སོགས་ཀྱིས་ཐོག་མའི་བསམ་འདུན་མ་བརྗེད་པར་བྱ་སྤྱོད་ངོ་མའི་ཐོག་ནས་འགན་འཁྲི་ལག་ལེན་དུ་བསྟར་ནས་མང་ཚོགས་ཀྱི་ཚེ་སྲོག་བདེ་ཐང་དང་བདེ་འཇགས་འགན་ལེན་བྱས་ཡོད།

ཟླ1བོའི་ཚེས31ཉིན། མཚོ་བྱང་མི་རིགས་ཁག་གི་མང་ཚོགས་ཀྱིས་རིམས་ནད་ལ་ཕྱོགས་ཡོངས་ནས་འགོག་རྒོལ་བྱེད་སྐབས། མཚོ་བྱང་ཁུལ་རྒྱ་གྲམ་དམར་བོ་ཚོགས་པར་ཞལ་འདེབས་ཕུལ་བའི་རྩིས་ཐོའི་ནང་མི་བུ་ལྷག་བསམ་ཅན་ཞིག་གིས་སྒོར3000ཞལ་འདེབས་སུ་ཕུལ་ཡོད་པ་རེད།

“ཐུགས་རྗེ་ཆེ་ཞུ། ཁྱེད་ཀྱིས་ཞལ་འདེབས་སུ་ཕུལ་བའི་སྒོར་མོ་ང་ཚོའི་ལག་ཏུ་འབྱོར་སོང”

“ད་ལྟ་རིམས་ནད་ཀྱི་གནས་བབ་འདི་འདྲའི་ཛ་དྲག་ཆེ་ཞིང་། སྨན་ཁང་གི་འགོག་སྲུང་དངོས་རྫས་ཀྱང་མི་འདང་བས། ངས་ཀྱང་རང་ནུས་ཅི་ལྕོགས་ཀྱིས་རིམས་ནད་སྔོན་འགོག་ཚོད་འཛིན་ལ་བྱ་བ་སྒྲུབ་ན་འདོད།”

ཡར་སྔོན་དྲ་ཐོག་ནས་ཞལ་འདེབས་སུ་ཕུལ་བའི་གནས་ཚུལ་ཤེས་རྟོགས་བྱ་ཆེད། ཞལ་འདེབས་རྒྱག་མཁན་དེས་ཁུལ་རྒྱ་གྲམ་དམར་བོ་ཚོགས་པའི་ལས་བྱེད་མི་སྣར་ཁ་པར་བརྒྱབ་ནས་བློ་འདྲི་བྱས་པ་དང་། ཁ་པར་ཨང་གྲངས་ཁུལ་རྒྱ་གྲམ་དམར་བོ་ཚོགས་པའི་ནང་བཞག་པ་རེད། ཟླ2པའི་ཚེས3ཉིན། གསར་འགོད་པས་ཁུལ་རྒྱ་གྲམ་དམར་བོ་ཚོགས་པར་རིམས་ནད་འགོག་བཅོས་ཀྱི་ཐད་དུ་མ་དངུལ་སྒོར3000ཞལ་འདེབས་སུ་ཕུལ་བའི་ལིས་ཅི་ཧྲིག་དང་འབྲེལ་གཏུག་བྱས་པ་རེད།

ལིས་ཅི་ཧྲིག་ལ་ད་དུང་བོད་མིང་ཞིག་ཡོད་དེ་ཐུགས་རྗེ་ཚེ་རིང་ཟེར་ཞིང་། འཇུ་ལག་ཧོས་རིགས་རང་སྐྱོང་རྫོང་འབྲུ་གུ་ཞང་དགོན་ལུང་སྡེ་བའི་ཡིན་ཞིང་། ད་ལོ་ལོ38རེད།

“ཟླ1བོའི་ཚེས31ཉིན། ངས་ལག་ཁྱེར་ཁ་པར་ལས་དངུལ་གཏོང་སྤྲོད་ཐབས་བརྒྱུད་དེ་སྒོར3000ཁུལ་རྒྱ་གྲམ་དམར་བོ་ཚོགས་པའི་ཞལ་འདེབས་རྩིས་ཁྲའི་ནང་ཕུལ་བ་ཡིན། གློ་བུར་དུ་རིམས་ནད་ཐོན་སྐབས་ང་ཚོ་མི་སེར་ཚོས་རོགས་རམ་བྱེད་མི་ཐུབ་ལ་འཐབ་ས་དང་བོར་ཡང་འགྲོ་མི་ཐུབ་པས་ངས་ནུས་ཤུགས་ཡོད་རྒུ་བཏོན་ནས་ཁ་ཐུམ་འགའ་དང་ལག་ཤུབས་འགའ་ཉོ་ཐུབ་རྒྱུའི་རེ་བ་བྱེད་ཀྱི་ཡོད”ཅེས་བཤད།

གསར་འགོད་པས་ཁོའི་ལས་རིགས་སྐོར་འདྲི་སྐབས་ཁོས་སྤྱིར་བཏང་གི་སྒོ་ནས“ང་ནི་མི་སེར་དཀྱུས་མ་ཞིག་ཡིན། ཉེ་བའི་ལོ་ཤས་རིང་ཡུལ་མི་ཁ་ཤས་ཀྱི་སྣེ་ཁྲིད་དེ་མཉམ་དུ་ཕྱི་རོལ་དུ་སོང་ནས་གླ་རྒྱག་བཞིན་ཡོད་པ་དང་། ནུས་ཤུགས་ཡོད་རྒུ་བཏོན་ནས་མི་དེ་བས་མང་བོས་རོགས་སྐྱོར་བྱས་ཏེ་ཕྱར་བ་གྲུ་འདེགས་ཀྱིས་རིམས་ནད་ལ་འགོག་རྒོལ་བྱ་རྒྱུའི་རེ་བ་བྱེད་ཀྱི་ཡོད”ཅེས་བཤད།

བཅར་འདྲི་བྱེད་པའི་ཁྲོད་ལིས་ཅི་ཧྲིག་གིས་འདི་ལས་ལྷག་པའི་དགེ་ལས་གང་མང་ཞིག་བསྒྲུབས་ཡོད་པ་ཤེས་ཡོང་།

རི་གཤམ་དུ་སྡོད་སྐབས་སྡེ་མི་ཚོར་དབྱར་གཞུང་གི་དུས་ཚིགས་སུ་ཏུང་ཧའེ་ལུང་ཤུར་གྱི་ཆུ་ལོག་གི་གནོད་འཚེ་མི་ཐེབས་པ་བྱེད་ཆེད། ན་ནིང་ཆར་དུས་སླེབས་ལ་ཉེ་བའི་སྔ་ནུབ་ཏུ་སྡེ་བའི་ནང་ཆུ་སྦུག་འཕེན་དགོས་པའི་ས་ཆ་ལྔ་བསྡོམས་རྩིས་བརྒྱབ་པ་དང་། ཁོ་རང་ཉིད་ཀྱིས་སྒོར2200བཏང་ནས་རྟ་ཐང་རྫོང་ནས་སྒོར3500ལྷག་ཙམ་གྱིས་ཆུ་སྦུག16ཉོས་ཏེ་ཏུང་ཧའེ་དང་ཧུང་ཝེ། ཞན་ཧྥིན་ཧྲེ་སོགས་སུ་དབོར་ནས་སྡེ་མི་ཚོའི་དཀའ་ངལ་དངོས་ཐག་གཅོད་བྱས་པས་སྡེ་མི་ཚོའི་བསྔགས་བརྗོད་ཐོབ་ཡོད།

2018ལོའི་ཟླ་མཆོད་དུས་ཆེན་གྱི་ཉིན་དེར། ཁོས་རང་ཉིད་ཀྱིས་དངུལ་བཏོན་ནས་འཇུ་ལག་རྫོང་མཁར་ཤར་རྒན་གསོ་ཁང་ལ་སྒོར2000ཞལ་འདེབས་སུ་ཕུལ་བར་མ་ཟད། སྒོར3500ཡིས་ཟླ་མཆོད་བག་ལེབ་དང་ཀ་ར། ཇ། འོ་མ་སོགས་ཉོས་ནས་རྒན་རྒོན་ཚོར་ལེགས་སྐྱེས་སུ་ཕུལ་བ་རེད། དེའི་རྒྱུ་མཚན་གྱི་སྐོར་གླེང་སྐབས་ཁོས“ང་ཚོའི་སྡེ་བའི་ནང་བུ་ཕྲུག་མེད་པའི་རྒན་རྒོན་ཞིག་ཀྱང་རྒན་གསོ་ཁང་དེར་བསྡད་ཡོད”ཅེས་སྟབས་བདེའི་ངང་བཤད།

དབུལ་ཐར་འགག་སྒྲོལ་བྱེད་པའི་རིང་། ཁོས་འཇུ་ལག་རྫོང་མཁར་ནས་སྒོར5500ལྷག་ཙམ་གྱིས་གྲོ་ཕྱེ་ཁུག་མ60ཉོས་ཏེ་སྡེ་བའི་ཁྱིམ་ཚང་དབུལ་བོར་དྲོ་སྐྱིད་སྦྱིན་པར་མ་ཟད། སྡེ་བའི་ཁྱིམ་ཚང་རེར་གྲོ་ཕྱེ་ཁུག་མ་གཉིས་རེ་བགོས་པ་རེད།

བརྩེ་བ་ཟབ་མོས་སྤྱི་ཚོགས་ལ་དྲོ་སྐྱིད་སྦྱིན། ཉེ་བའི་ལོ་ཤས་རིང་། ལིས་ཅི་ཧྲིག་གིས་སྤྱི་ཚོགས་ལ་གཅེས་སེམས་ཕུལ་བར་ནུས་པ་ཆེན་པོ་མེད་ཀྱང་། དུས་དང་རྣམ་པ་ཀུན་ཏུ་མེས་རྒྱལ་དང་ཡུལ་མི་ཚོ་སེམས་སུ་བཅངས་ནས་རང་ཉིད་ཀྱི་གཅེས་སེམས་སྤྱི་ཚོགས་ལ་བརྒྱུད་སྤྲོད་བྱས་ཏེ་མི་དེ་བས་མང་བོར་གཅེས་སེམས་མཚོན་པར་བྱས་ཡོད། ལོ་ཤས་རིང་། ཁོས་སྤྱི་ཚོགས་དབུལ་སྒྲོལ་དང་རོགས་སྐྱོར་སོགས་གཅེས་སེམས་ཀྱི་བྱ་གཞག་ལ་ཞལ་འདེབས་སུ་ཕུལ་བའི་དངུལ་སྨར་དང་དེ་བཞིན་དངོས་ཟོག་གི་རིན་ཐང་སྒོར་ཁྲི2ལྷག་ཙམ་ཟིན་ཡོད།

ཉེ་ཆར། ཁུལ་རྒྱ་གྲམ་དམར་བོ་ཚོགས་པའི་རྩིས་ཁྲའི་ཐོག་གཅེས་སེམས་མི་སྣའི་ཞལ་འདེབས་ཕུལ་བ་རྒྱུན་ཆད་མེད་པར་མངོན་པ་དང་རིམས་ནད་སྔོན་འགོག་ཚོད་འཛིན་ལ་ནུས་ཤུགས་ཡོད་རྒུ་བཏོན་ཡོད། མི་སེར་དཀྱུས་མ་རེ་རེ་དང་སྤྱིར་བཏང་གི་དོན་ཆུང་རེ་རེ་བཞིན་རྒྱལ་ཁབ་དཀའ་ཁག་ལ་འཕྲད་སྐབས་ལིས་ཅི་ཧྲིག་ལྟ་བུའི་གཅེས་སེམས་ལྡན་པའི་མི་སེར་དཀྱུས་མ་མང་བོས་སྤྱི་ཚོགས་ཀྱི་འགན་འཁྲི་བླ་མེད་ཅིག་ཕྲག་ཏུ་འཁུར་ཡོད།

གསར་བྱུང་ཏོག་དབྱིབས་ནད་དུག་གི་གློ་ཚད་འགོས་ནས་གློ་ཚད་ཀྱི་རིམས་ནད་དྲག་ཏུ་རྒྱུག་པ་དེས་དགུན་ཁ་འདིར་སྔར་ལས་ལྷག་པའི་འཁྱག་སིབ་སིབ་ཀྱི་གྲང་ངར་ཞིག་བསྩལ། ཡིན་ནའང་། རིམས་ནད་འགོག་བཅོས་ཀྱི་འཐབ་ས་དང་བོར་འབད་འཐབ་བྱེད་མཁན་གྱི་དཔའ་བོ་དེ་དག་གིས་མཇུག་མཐར་རིམས་ནད་སྔོན་འགོག་ཚོད་འཛིན་གྱི་འགོག་རྒོལ་དམག་འཐབ་ལ་རྒྱལ་ཁ་ཐོབ་རྒྱུར་ང་ཚོར་ཡིད་ཆེས་ཀྱིས་ཁེངས་ཡོད། རིམས་ནད་ཀྱི་གྲིབ་ནག་འོག་དགེ་ལས་མང་བོ་བྱེད་མཁན་གྱི་མི་བུ་དག་གི་གཅེས་སེམས་ང་ཚོས་རིམས་ནད་དང་འཐབ་རྩོད་བྱེད་སྐབས་ཐོག་མཐའ་བར་གསུམ་དུ་ཚོར་གྱི་ཡོད། ནད་དུག་ལ་སྙིང་རྗེ་མེད་ཀྱང་མི་ཡུལ་དུ་བྱམས་བརྩེས་ཁེངས་ཤིང་དྲོ་སྐྱིད་ལྡན་པའི་རྣམ་པ་དེས་རྡོག་རྩ་གཅིག་སྒྲིལ་གྱིས་དགུན་དུས་ཀྱི་གྲང་ངར་དེ་བཅོམ་ཞིང་། ང་ཚོའི་སེམས་སུའང་དགུན་ཚར་ན་དཔྱིད་དཔལ་གྱི་སྣང་བརྙན་ཞིག་ཀྱང་ངང་གིས་ཤར་བ་བསྟན་ཡོང་།