མཚོ་སྔོན་ཞིང་ཆེན་གྱི་ཏང་སྲིད་འཐུས་ཚབ་ཚོགས་པ་ཧྲང་ཧེ་རུ་སོང་ནས་རྟོག་ཞིབ་དང་སློབ་སྦྱོང་བྱས་པ།

མཚོ་སྔོན་གསར་འགྱུར་དྲ་བའི་འཕྲིན་ལྟར་ན། ཟླ10པའི་ཚེས9ཉིན་ནས་ཚེས10ཉིན་གྱི་སྔ་དྲོའི་བར་དུ། མཚོ་སྔོན་ཞིང་ཆེན་གྱི་ཏང་སྲིད་འཐུས་ཚབ་ཚོགས་པ་ཧྲང་ཧེ་རུ་སོང་ནས་དེ་གའི་བྱ་བར་རྟོག་ཞིབ་དང་སློབ་སྦྱོང་བྱས། ཚེས9ཉིན་གྱི་ཕྱི་དྲོར། ཧྲང་ཧེ་ཡི་མཚོ་སྔོན་ཁ་གཏད་རོགས་སྐྱོར་བྱ་བའི་བཞུགས་མོལ་ཚོགས་འདུ་བསྡུས་ཤིང་། ཀྲུང་གུང་ཀྲུང་དབྱང་ཆབ་སྲིད་ཅུའུ་ཡི་རྒྱུན་ལས་ཨུ་ཡོན། ཧྲང་ཧེ་གྲོང་ཁྱེར་ཏང་ཨུའི་ཧྲུའུ་ཅི་ལིས་ཁི་ཡིས་གྲོས་ཚོགས་ལ་འགོ་འཛིན་བྱས་ཏེ་གཏམ་བཤད་གནང་། མཚོ་སྔོན་ཞིང་ཆེན་ཏང་ཨུའི་ཧྲུའུ་ཅི་དང་། ཞིང་ཆེན་དམངས་ཆེན་རྒྱུན་ལས་ཨུ་ཡོན་ལྷན་ཁང་གི་ཀྲུའུ་རིན་ཝང་ཅན་ཅུན་གྱིས་ཚོགས་ཐོག་ནས་གཏམ་བཤད་གནང་། ཧྲང་ཧེ་གྲོང་ཁྱེར་ཏང་ཨུའི་ཧྲུའུ་ཅི་གཞོན་པ། ཧྲི་ཀྲང་དབྱིན་ཡུང་དང་། མཚོ་སྔོན་ཞིང་ཆེན་ཏང་ཨུའི་ཧྲུའུ་ཅི་གཞོན་པ། ཧྲིན་ཀྲང་ལིག་ཉིང་གིས་ཞིང་ཆེན་དང་གྲོང་ཁྱེར་གཉིས་ཀྱི་དཔལ་འབྱོར་དང་སྤྱི་ཚོགས་འཕེལ་རྒྱས་གནས་ཚུལ། མཚོ་སྔོན་གྱི་ཁ་གཏད་རོགས་སྐྱོར་བྱ་བའི་གནས་ཚུལ་བཅས་མཚམས་སྦྱོར་བྱས་པ་མ་ཟད། ཞིང་ཆེན་དང་གྲོང་ཁྱེར་གཉིས་ཀྱི་མི་དམངས་སྲིད་གཞུང་གིས་ཁ་གཏད་རོགས་སྐྱོར་ལས་དོན་དང་ཁྱབ་ཁོངས་གཙོ་བོའི་མཉམ་ལས་བྱ་བར་ཤུགས་སྣོན་དགོས་པའི་སྐོར་གྱི་སྒྲོམ་གཞིར་གྲོས་མཐུན་བཀོད་པ་རེད།

ལིས་ཆང་གིས་ཧྲང་ཧེ་གྲོང་ཁྱེར་ཏང་ཨུ་དང་གྲོང་ཁྱེར་སྲིད་གཞུང་། གྲོང་ཁྱེར་ཡོངས་ཀྱི་མི་དམངས་བཅས་ཀྱི་ཚབ་བྱས་ཏེ། མཚོ་སྔོན་གྱིས་དུས་ཡུན་རིང་པོར་ཧྲང་ཧེ་ཡི་འཛུགས་སྐྲུན་དང་འཕེལ་རྒྱས་ལས་དོན་ལ་རྒྱབ་སྐྱོར་རོགས་འདེགས་བྱས་པ་དང་། ཧྲང་ཧེ་ཡི་མཚོ་སྔོན་ལ་ཁ་གཏད་རོགས་སྐྱོར་སྤེལ་མཁན་གྱི་ལས་བྱེད་པར་སེམས་ཁུར་དང་གཟིགས་སྐྱོང་གནང་བར་བཀའ་དྲིན་ཞུས། ཁོས་བཤད་རྒྱུར། ཉེ་བའི་ལོ་འདི་དག་གི་རིང་ལ། མཚོ་སྔོན་གྱིས་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་མཚོ་སྔོན་ལ་བཏོན་པའི་མཛུབ་སྟོན་བླང་བྱ་གལ་ཆེན་དཀྱིལ་སྙིང་དུ་བཟུང་ནས། “སྔོན་འགྲོ་གཅིག་དང་མཐོ་བ་གཉིས”ཀྱི་འཐབ་ཇུས་བཀོད་སྒྲིག་ལག་ལེན་གཏིང་ཟབ་བྱས་པར་བརྟེན། དཔལ་འབྱོར་འཕེལ་རྒྱས་ཀྱི་རྣམ་པ་སྐས་རིམ་གསར་པ་ཞིག་ཏུ་སླེབས་ཡོད་པར་མ་ཟད། ཐོན་ལས་གཙོ་བོར་ཐོད་བརྒལ་གསར་པ་བྱུང་བ་ལས་གཞན། དབུལ་ཐར་མཁྲེགས་གཏོར་གྱི་གོམ་སྟབས་གསར་པ་བསྒྱུར་ནས། ལས་རིགས་ཁག་སོ་སོས་གྲུབ་འབྲས་མིག་མཐོང་ལག་ཟིན་བླངས་ཡོད་པས། མཚོ་སྔོན་གྱི་ཉམས་མྱོང་དང་སྙིང་སྟོབས་འདི་ལྟ་བུར་ཧྲང་ཧེ་གྲོང་ཁྱེར་གྱིས་སློབ་སྦྱོང་ནན་མོ་བྱེད་དགོས་ཟེར།

ཝང་ཅན་ཅུན་གྱིས་མཚོ་སྔོན་ཞིང་ཆེན་ཏང་ཨུ་དང་ཞིང་ཆེན་སྲིད་གཞུང་། ཞིང་ཆེན་ཡོངས་ཀྱི་རིགས་སོ་སོའི་མི་དམངས་བཅས་ཀྱི་ཚབ་བྱས་ཏེ། ཧྲང་ཧེ་གྲོང་ཁྱེར་གྱིས་ལོ་ངོ་དུ་མའི་རིང་ལ་མཚོ་སྔོན་ལ་ལྷག་བསམ་ཟོལ་མེད་ཀྱི་ངང་ནས་རོགས་སྐྱོར་དང་རོགས་འདེགས་གནང་བར་ཞེ་ཐག་པ་ནས་བཀའ་དྲིན་ཞུས། ཁོས་བཤད་རྒྱུར། ཀྲུང་དབྱང་གིས་ཧྲང་ཧེ་གྲོང་ཁྱེར་མཚོ་སྔོན་གྱི་མགོ་ལོག་བོད་རིགས་རང་སྐྱོང་ཁུལ་ལ་ཁ་གཏད་རོགས་སྐྱོར་སྤེལ་མཁན་དུ་གཏན་འབེབས་བྱས་པ་ནས་བཟུང་། ཧྲང་ཧེ་གྲོང་ཁྱེར་ཏང་ཨུ་དང་གྲོང་ཁྱེར་སྲིད་གཞུང་གིས་བློ་ཐག་རྦད་ཆོད་སྒོས་སྤྱི་ཁྱབ་ཧྲུའུ་ཅི་ཞི་ཅིན་ཕིང་དང་ཏང་ཀྲུང་དབྱང་གི་མཚོ་སྔོན་ཁ་གཏད་རོགས་སྐྱོར་བྱ་བའི་འཐབ་ཇུས་ཇུས་ཆོད་དངོས་འབེབས་དོན་འཁྱོལ་བྱས་ཏེ། ཆབ་སྲིད་ཀྱི་གོ་གནས་མཐོ་ཞིང“འདུ་ཤེས་བཞི”སྔར་ལས་དྲག་པ། འགོ་ཁྲིད་ཀྱིས་མཐོང་ཆེན་གང་ལེགས་གནང་བ། དབུལ་སྐྱོར་བྱེད་ཤུགས་རིམ་པ་རེ་རེ་བཞིན་ཇེ་དྲག་ནས་ཇེ་དྲག་ཡིན་པ། དངོས་གཉེར་གནད་ཕིགས་ལ་རོགས་འདེགས་བྱས་པ། ལས་བྱེད་པ་ཕན་ཚུན་བར་མཛའ་མཐུན་དང་བརྩི་བཀུར་ཡོད་པ། བརྩེ་བ་བཅངས་ནས་ལས་དོན་སྤེལ་བ། ཕན་སེམས་བཅངས་ནས་མ་དངུལ་བསྐྱལ་བ། འོས་འགན་ཡིད་ལ་བཅངས་ནས་ལས་གཞི་དངོས་འབེབས་དོན་འཁྱོལ་བྱས་པར་མ་ཟད། ད་དུང་ཧྲང་ཧེ་གྲོང་ཁྱེར་གྱིས་མགོ་ལོག་མི་དམངས་རང་གི་གཉེན་ཉེ་ཡི་ཚབ་ཏུ་བཞག་ནས་རོགས་སྐྱོར་བྱས་པ་དང་། མགོ་ལོག་མི་དམངས་ཀྱིས་ཀྱང་ཧྲང་ཧེ་མི་དམངས་རང་གི་དྲིན་ཅན་གྱི་ཚབ་ཏུ་བཀུར་ཡོད་པས། ས་གནས་གཉིས་ཀྱི་དམངས་སེམས་གཅིག་འདྲེས་བྱུང་ཡོད་ལ། ལག་ལེན་གྱིས་ཏང་ཀྲུང་དབྱང་གི་ཁ་གཏད་རོགས་སྐྱོར་བྱ་བའི་མིག་རྒྱང་རིང་པོ་དང་བདེན་དངོས་རང་བཞིན་ར་སྤྲད་པར་མ་ཟད། ཧྲང་ཧེ་གྲོང་ཁྱེར་གྱིས་མཚོ་སྔོན་ལ་ཁ་གཏད་རོགས་སྐྱོར་བྱས་ནས་ཕན་འབྲས་ངེས་ཅན་བླངས་ཡོད་ཟེར།

ཧྲང་ཧེ་གྲོང་ཁྱེར་གྱི་འགོ་ཁྲིད་མི་སྣ་ཡུན་ཡུས་ཚོས་དང་ཡུས་ཧོང་། ཝུན་ཙུའུ་ལེང་། ཀྲུའུ་ཀི་ཡུས་ཅེ། ཕིན་ཁྲིན་ལའེ། ཧྥང་ཧོས་ཕིན་བཅས་དང་། མཚོ་སྔོན་ཞིང་ཆེན་གྱི་འགོ་ཁྲིད་མི་སྣ་རྡོ་རྗེ་རབ་བརྟན་དང་ཝང་ཞའོ། ཝང་ཡུས་པའོ། ཡུས་ཚུང་ལི། ཀོ་ཧྭ་བཅས་གོང་གསལ་བྱ་འགུལ་ལ་ཞུགས་པ་རེད།

ལོ་ཙཱ་བ། ཡེ་ཤེས་སྒྲོལ་མ།